科技樹

科技樹（technology tree）係喺有升呢機制嘅遊戲當中常見嘅系統，指以決策樹（decision tree）形式表示玩家喺升呢嗰陣有得揀嘅新異能：喺有升呢機制嘅遊戲當中，玩家升到咁上下等級可以揀新異能嚟用，當中（例如）有兩個異能，B 同 C，要喺玩家有咗異能 A 嗰陣先有得攞，所以如果用決策樹表達嘅話，B 同 C 就會係 A 嘅分枝，而將成隻遊戲嘅異能畫做噉嘅分枝圖表達出嚟嘅，就係所謂嘅科技樹。科技樹喺即時策略遊戲當中常見，而當用喺 RPG 嗰陣，科技樹通常會俾人嗌做「技能樹」（skill tree）。