拉斯維加斯金沙集團

  想搵第二個意思嘅話，請睇金沙。

拉斯維加斯金沙集團股份有限公司（英文：Las Vegas Sands Corp.）係間賭業同酒店業公司，總部設於美國內華達州天堂，喺澳門同新加坡都有架步，子公司包括金沙中國。

威尼斯人酒店

禍

响2009年暮秋，有單「江湖格殺令」案喺香港高等法院宣判，五個被告要坐好耐監，當時傳媒提到幕後主腦未繩之於法。

响2010年3月29號，英國路透社報道：
該社獲得先前冇公開過，上述嗰單案嘅法庭筆錄文件，由之得知，證人供稱張治太係主使人。佢亦喺審訊當中，被指為香港三合會和合圖嘅一個領䄂，綽號「掙爆」，又係澳門金沙娛樂場內賭廳，成都貴賓會嘅揸拂人。雖然如此，但係張治太冇出過庭，亦唔係被告；香港警務處唔肯就此作詳細解釋；香港政府用衣貓確認，有個姓張嘅49歲男人曾經被捉，不過攞到嘅法律意見指唔夠料起訴佢，於是放走咗；問過香港警務處同埋喺澳門嘅美國賭業人士，都冇法子得知佢喺焉處。英國路透社同美國加州大學柏克萊分校調查報道計劃一齊研究，得出張治太同拉斯維加斯金沙有關係嘅結論，而噉樣或者會令後者違反美國內華達州博彩法例；拉斯維加斯金沙發表聲明話，按佢哋所知，張治太並非該公司所用嘅博彩中介人之董事或股東，而冇講更多。

响2010年3月31號，英國路透社報道：
美國內華達州博彩監管局委員蘭度沙耶响2010年3月31號用衣貓表示，正喺道分析緊澳門賭場入面嘅賭廳之運作狀態，以及佢哋同中國犯罪分子之間有冇關連，當中拉斯維加斯金沙亦會理到。

綜合新加坡《商業時報》响2010年4月3號同新加坡《聯合早報》响2010年4月4號嘅報道：
新加坡賭場管制局被詢問以上事宜對於審批賭牌有冇影響，唔肯評論；而拉斯維加斯金沙則聯絡唔到。响2009年11月提交申請，新加坡濱海灣金沙嘅賭場執照仍然審核緊。

响2010年4月6號，新加坡國民團結黨發出其秘書長吳明盛署名嘅文告，表示：
該黨關注上述事件……提及新加坡人民行動黨執掌嘅政府，响2005年扑鎚准起兩間賭場時，講明唔會將賭場執照發畀任何同三合會有關連嘅營運者……該黨十分擔心佢哋會對當地社會有壞影響……希望新加坡賭場管制局慎重考慮畀唔畀濱海灣金沙攞牌，亦想知道，萬一佢哋攞咗牌之後先至被證實身有屎，政府會點處理……

响2010年4月26號，新加坡賭場管制局發布公告稱：
已經批准新加坡濱海灣金沙經營若干賭場業務。

响2010年4月27號，新加坡濱海灣金沙嘅賭場、部分酒店房間及金沙會展中心開業。

拎

• Home