開主選單

維基百科 β

 拜倫莫雷諾粵拼baai3 leon4 mok3 leoi4 nok3西班牙文Byron Moreno西班牙文讀音:[ˈbaɪᵊrən moɾeno]1969年11月23號—)係厄瓜多爾足球球證基多人。佢曾經喺2002年FIFA世界盃——南韓對陣意大利隊嘅比賽俾好多波迷投訴而出名。

目錄

執法生涯

莫雷諾喺1996年加入球證行去執法各項足球比賽,第一次正式執法嘅國際比賽係1997年6月8號,嗰場進軍1998年FIFA世界盃南美資格賽——玻利維亞對陣委內瑞拉嘅賽事。隨後從2002年開始,連續三場足球賽爆出醜聞而喺2003年6月宣佈退役。

2002年FIFA世界盃

內文: 2002年FIFA世界盃

2002年6月18號晚黑(UTC+9),嗰時打緊足球世界盃16強,由於莫雷諾俾FIFA要求去執法南韓對陣意大利隊嘅比賽,打到下半場第77分鐘,直接將原先達美安奴·湯馬斯嘅有效入波以越位嘅名義話成詐糊。甚至喺加時上半場第93分鐘,直接話喺禁區插水嘅理由而將托迪以兩黃變一紅嘅形式罰落場[1]。賽後喺全球各地發生好大拗數:喺意大利羅馬,有波迷喺賽後重當街鬧執法球證(拜倫莫雷諾),亦有媒體話呢位球證係咪俾南韓隊買通咗比賽[2]。尤其喺澳洲墨爾本,當地爆發咗嚴重足球騷亂,直到同年同月19號凌晨1點(UTC+10)先至結束[3]

超長嘅補時13分鐘

2002年FIFA世界盃結束後,莫雷諾返到厄瓜多爾執法足球賽事,喺2002年9月8號晚黑(UTC-5)嘅基多利家大學對陣巴塞隆拿嘅友誼賽亦出過醜聞。嗰場比賽下半場原先補時6分鐘,點知佢將場比賽補時咗13分鐘,令基多利家大學喺補時第9同11分鐘連入兩波反勝巴塞隆拿[4][5]。賽後又引發咗波迷投訴點解呢場熱身賽太長傷停補時。

處罰

莫雷諾除咗喺球證界受過處罰外,同樣試過因為虐待細路、酒後駕駛同埋走私毒品而被處罰。

第一次

由於爆發2002年世界盃16強比賽同埋13分鐘補時呢兩單足球醜聞,同年9月俾基多嘅城市法院判決咗從2002年10月開始,連續20場足球賽都唔畀佢執法[6]及接受厄瓜多爾足球協會嘅調查[7]

第二次

莫雷諾喺第一次處罰場次數期滿後復出執法,隨後喺2003年5月18號執法咗厄甲——基多對陣昆卡嘅比賽,雖然全場兩隊打成1-1,但因為比賽半佬罰咗3位波手落場而引起投訴,隨後又加罰一場停賽[8]。同年6月,莫雷諾因為收到太多同佢有關嘅足球醜聞而宣佈退役[9]

第三次

2010年9月21號,莫雷諾喺紐約甘迺迪國際機場準備入境美國時,俾美國海關查到佢條底褲㔷埋咗超過6公斤(13英鎊,12市斤)嘅海洛英而收監[10]。隨後雖然美國海關喺2011年1月向紐約法院提出對莫雷諾因為涉嫌毒品走私嘅罪行而做出監禁10年嘅處罰[11],但2011年9月23號判咗監禁2年半嘅處罰[12]。莫雷諾喺2014年3月出獄兼返到厄瓜多爾[13]