捷思式演算法

捷思式演算法（英文：heuristics），又叫啟發式演算法，係演算法嘅一種，個名嚟自認知心理學上嘅「捷思法」。捷思式演算法特性係唔要求吓吓都要絕對最佳，肯為咗快啲而放棄些少準確性^[1]。

例如家陣有段演算法 A，用 A 解條問題要行成兩個月先行得完（嘥時間），但 A 包保 100% 搵到正確答案（絕對最佳）；而又有段演算法 B，用 B 解條問題得 80% 機率搵到正確答案（放棄咗些少準確性），但段演算法可以喺 10 分鐘之內行完（快啲）。噉 B 就係一段捷思式演算法。