摩登如來神掌

摩登如來神掌
Kung Fu VS Acrobatic
摩登如來神掌; Kung Fu VS Acrobatic
資料明細
導演	黃泰來
監製	向華勝
劇本	王晶
主演	劉德華; 陳百祥; 王祖賢; 梅小惠; 元華
配樂作曲	盧冠廷; 周錦祥
攝影	鐘志文; 李子衡; 陳兆君
剪輯	蔡雄
製片商	永盛娛樂製作有限公司
片長	99分鐘
產地	英屬香港
話	粵語
上畫同發行
上畫日期	1990年7月21號
發行商	新寶娛樂有限公司
票房	HK$11,160,216

《摩登如來神掌》（英文：Kung Fu VS Acrobatic）係一套於1990年 7月21號上映嘅港產片，呢套電影為香港邵氏電影系列出品嘅漫畫式幻想武俠片，由黃泰來執導、王晶編劇，劉德華、陳百祥、王祖賢、梅小惠、元華等領銜主演，上映日數為22日，總共收咗一千一百一十六萬幾港紙票房排名第34位。其片名中嘅「如來神掌」實係一種虛構武功。

劇情大綱編輯

廣告公司職員武德輝（劉德華飾）同好友厲遲（陳百祥飾）往中國大陸出差，期間厲遲欲走私出土文物；冇幾耐被公安追捕而誤入某山洞，雖然為毒蛇所噬，但係因為喺大俠龍劍飛身上尋得大還丹，解毒之餘更得到十幾二十年內功修為，且意外救得冰封八百年嘅元朝雲蘿公主（王祖賢飾）及其婢女小蠻（梅小惠飾），同時讓二百年前天下第一邪派高手天殘（元華飾）逃脫而出。

對百年前事抱持懷疑態度嘅武德輝同厲遲，將雲蘿公主二人帶返香港；冇諗到雲蘿聰明無比，迅速適應香港現代生活並成為時代女性。一方面，為對付天殘，雲蘿幫助武德輝學成「如來神掌」，厲遲則因資質較差，僅練成「七旋斬」；天殘到嚟，未練成第九式「萬佛朝宗」嘅武德輝不敵，並且被迫食下天蠶蟲，只要天殘拍擊佢腰上嘅鼓，食下天蠶蟲嘅人就會感到非常痛楚。

第二日天殘喺銀行拆去提款機嚟盜取錢財，而武德輝同厲遲喺天殘嘅威脅下到老闆嘅居所並捉捕老闆一家，就連一眾警員出動亦不敵天殘，後嚟被雲蘿用計將佢哋救出，武德輝逃走時被天殘打至重傷。幸得走到香港嘅「特異功能表演團」團長嚴真（劉洵飾）為其療傷，更傳授佢吸收天地能量術；幾日之後，武德輝發揮「萬佛朝宗」之威力，廢去天殘武功，成為真正大俠。

人物角色編輯

演員	角色	備註
劉德華	武德輝	廣告公司職員；同厲遲同住，之後意外識得雲蘿公主，並練成如來神掌
陳百祥	厲遲	廣告公司職員；同武德輝同住，經歷奇遇練成奇功
王祖賢	雲蘿公主	元朝公主；有一婢女小蠻，之後同武德輝等人同住
梅小惠	小蠻	雲蘿公主侍婢；意外同厲遲有婚約
元華	天殘	邪派第一高手；鍾意雲蘿公主，鍾意食漢堡包
曹達華	古蛇	小說家，厲遲爸爸；被天殘誤認為高手「龍劍飛」（事實上如來神掌電影系列中嘅龍劍飛乃曹達華飾演）
劉洵	嚴真	特異功能大師；幫武德輝療傷
倪秉郎		廣告公司老闆；被天殘當作港督捉拿
劉志榮		（客串）警官；解救被天殘脅為人質嘅警方指揮官
成奎安	大傻	交通警察；幫武德輝對付無良巴士司機
李兆基		打手；幫高利貸對付厲遲
陳敬		人蛇；幫武德輝同厲遲偷渡返香港