撈鬆

  呢篇文講花名。想搵音樂製作人嘅話，請睇撈仔 (音樂人)。

撈鬆（粵拼：laau1 sung1）係形容講官話人士嘅粵語蔑稱。呢個詞據說係源於講國語人士嘅一句口頭禪老兄，因為佢哋好鍾意叫人「老兄」，而近代講粵語嘅人士開頭想用同樣稱呼表示對佢哋嘅尊重，但係又難以模仿佢哋嘅國語口音，於是乎將講國語人士稱呼為「撈鬆」，後來以訛傳訛變成歧視啲講國語人士嘅統一稱呼。

另外重產生咗「撈佬」、「撈頭」、「撈仔」、「撈妹」甚至「撈屄」、「撈B」呢啲配搭粗口用嘅貶義詞。

而家啲唔識講粵語嘅新一代廣府人就畀人叫做本地撈。