廣東人鍾意食生魚進補,響劏生魚之前,會將條生魚猛咁撻,撻到佢暈為止。呢個行為叫做撻生魚

撻生魚嘅目的,係方便劏魚。因為生魚非常生猛,離水幾個鐘頭都唔死,唔撻暈佢,劏嗰陣時就會掙扎,好難舞得佢掂。

不過,一般廣東人就唔係咁諗:佢哋撻生魚,係為咗避免食錯「化骨龍」而死。化骨龍係傳聞中嘅生物,外表極之似生魚,只係多咗四隻腳。但係化骨龍平時會縮埋佢啲腳,扮生魚扮到十足十,要到暈咗先致會伸返啲腳出來。所以廣東人劏生魚之前,要撻暈條魚,睇下佢會唔會凸返啲腳出來,見唔到有腳,先致敢劏來食。

因為成日做,撻生魚亦成為口頭禪來形容跌得好甘,好似:「尋晚去學柔道,俾人撻生魚撻足成晚。」

出面網頁

  • 撻生魚 (2006-06-19)
  • WUnique 論壇 » 泰恐怖 » 1950年代出現過化骨龍,一家飲了化骨龍嘅湯都死晒,當時香港新聞都報導過 (2007-07-11T21:47)
  • 生魚化骨龍 (2006-06-02T17:37)