陀地

(由收陀地跳轉過嚟)

陀地粵拼to4 dei6*2)或者保護費,係種黑社會常用嘅揾錢方法[1],通常都唔合法。呢種生意喺低踎嘅街、商場同埋小販區特别普遍,尤其係啲有唔太正路(例如賣冒牌貨、無攞正牌擺檔、走税、收買賊贓黃賭毒……)勾當嘅地方。收保護費並唔係幫會嘅專利。

典型解釋

保護費係黑幫靠嚇,靠搗亂,向勢力範圍入面嘅商人勒索嘅錢銀,要人哋定期交。否則就搞亂檔,阻住渠做生意[2]

其他解釋

唔交保護費,最可能嘅後果係俾(叫攞錢嘅或者其他)匪徒傷害人身或者財產。由於唔少治安部門同幫會都有貪腐嘅商業合作[3],商家或者會俾政府選擇性針對執法,甚至老屈,兼出動埋政府司法部門迫害[4]

亦有執法者唔只知法犯法,重要肆無忌憚,親自出馬收保護費[5]。收到錢,就將本應出手阻止嘅嘢,當睇唔到。

有啲保護費用途同「街道租金」差唔多,所用來買嘅「服務」,係趕走同行對手。喺某啲熱鬧嘅街上面,無牌收買佬/婆同埋小販分布得井然有序,河水不犯井水,正係由於呢種商業模式作祟[6]

詞義分析

保護費顧名思義,就係買「保護服務」嘅酬金。而所謂「保護」,即係防止渠俾人哋搞。會想施害嘅,可以係商人(合法同非法嘅都包)、無組織麻煩人(獨行賊、鬧事友……)或者有組織匪類(幫會、妄顧法紀嘅政府部門……),亦唔少得嗌攞保護費嗰個/班人。收保護費嘅,除咗法外團體之外,重有目無法紀嗰啲官府中人[7](由黑幫度領分贓或者親自去收嘅都有)。

喺政府無好好維持治安嘅地方,民間就好可能會有組織冒起,自己管理。雖然渠哋有大把會作奸犯科,但係往往會自設規則來維持秩序。通常,商人只係要交保護費畀嗰處勢力最大嘅黑幫(用「甲」作代號),若果突然有另一派(簡稱「乙」)嗌渠交保護費,商人就會叫「甲」「保護」——即係用江湖手段同「乙」決定之後誰主浮沈[8]

約定俗成,「保護費」多數帶啲唔跟法律嘅意思。正式請有牌看更或者保鏢嘅使費,一般叫做「管理費」/「保安費」。「保護費」好多時又叫做「陀地(費)」[9]

參考

  1. "被索保護費影音店報警 臥底警拘「和勝和」六人". Apple Daily 蘋果日報 (中文). 喺2020-10-01搵到.
  2. "- 以保護為名的勒索罪(第6/97/M號法律第3條第1款及第3款) - 持有禁用武器罪(澳門《刑法典》第262條第3款)". www.court.gov.mo. 喺2020-10-01搵到.
  3. "西安报业传媒集团 数字报刊". epaper.xiancn.com. 喺2020-10-01搵到.
  4. 伍麗微 (2019-01-18). "【專訪】當差28年 退休研警隊史 凌劍剛:做一個正直的警察很難|01周報". 香港01 (中文). 喺2020-10-01搵到.
  5. "《嚤囉街高談闊論 (復刻版) – 大班細談香港暴動史;五、六十年代華探長的黑幕;趣談香港自訂車牌的發展。 》主持:鄭經翰 林旭華 梁家權" (廣州話). D100 Radio. 2020-07-09.CS1 maint: unrecognized language (link)
  6. 121625551334730. "【直擊黑幫收陀地】旺角小販擺檔要畀一千蚊 古惑仔寸爆兇人:你哋拖馬同我傾|壹週刊". 壹週刊. 喺2020-10-01搵到.
  7. "廣西台商遭公安勒索保護費 盼海基會協助究責 | 兩岸 | 中央社 CNA". www.cna.com.tw (中文). 喺2020-10-01搵到.
  8. 自由時報電子報 (2014-07-11). "幫派爭地盤火併 1命危8傷 - 地方". 自由時報電子報 (中文). 喺2020-10-01搵到.
  9. "現代標準漢語與粵語對照資料庫". apps.itsc.cuhk.edu.hk. 喺2020-10-13搵到.