斯莫奇 (狗)

斯莫奇（英文：Smoky），係一隻響第二次世界大戰服役同因此成名嘅約室爹利狗，重四磅 (1.8 kg)，高七英寸 (18 cm)。佢係世上第一隻醫生狗，工作主要係陪護士看護傷兵。

生平

俾人發現

響1944年2月，斯莫奇喺新畿內亞叢林一個散兵坑入面俾一個美國士兵救番出嚟。當時，斯莫奇已經係一隻成年嘅約室爹利。初頭，尐士兵以為斯莫奇係日本嚟嘅，但係當佢哋送佢去戰俘營嗰陣時，佢哋先至發現斯莫奇唔明日文同英語嘅命令。之後，另一個士兵將斯莫奇賣咗俾威廉·A·懷恩下士。

第二次世界大戰

響跟住嗰兩年，斯莫奇同主人懷恩一齊參與太平洋嘅戰爭。期間，佢生活艱難、環境惡劣。斯莫奇同懷恩分享軍糧，偶爾可以食午餐肉。同二戰期間正式嘅戰狗唔同，斯莫奇無獲配足夠嘅獸醫藥品，亦都無均衡飲食；儘管係咁，斯莫奇從來無病過。

根據懷恩嘅描述，斯莫奇曾經響南太平洋喺第5航空隊、第26攝影偵察中隊入面服役，又參與咗12個空中/海上救援同偵察任務。喺呢尐任務入面，斯莫奇需要長時間留響士兵嘅背襄。斯莫奇因為參與咗12項任務，所以獲頒8枚服務勳章。斯莫奇響新畿內亞超過150次嘅空襲入面生還，又曾經警告懷恩有炮彈來襲，重救咗佢一命。

戰後

打完仗，懷恩同斯莫奇嘅事蹟喺1945年12月俾《克利夫蘭新聞》登出嚟，好快就轟動全國。

響1957年2月21號，斯莫奇死咗，享年14歲，葬咗喺克利夫蘭都會公園。美國一共有六座紀念斯莫奇嘅紀念碑。