新以泰

新以泰（粵拼：san1 ji5 taai3），係一間喺廣東廣州嘅文體用品商舖，宜家嗌新以泰體育用品公司，地埠中山四路178~186號。

歷史

原本由廣東番禺嘅鐘錦泉喺清咸豐末年（1860年）創建，開初叫以泰文房四寶店，設址惠愛八約（同現址），前邊賣嘢後邊工場廠，可以加工毛筆，賣嘅有毛筆、玉扣紙、印泥、墨硯、簿冊、學生手工作業紙、中西式帳冊、信箋、信封、鎮紙、筆筒、通勝、冥鏹；仲賣過土洋紙，渠嘅印刷工廠同過左近嘅八桂中學、禺山中學、嶺僑中學、開越中學(宜家嘅廣州廣播電視大學位置)同中大附中等本地學校印製學生功課簿，仲專登分別印埋校名。同時仲同中山醫學院、華強醫院、圖強醫院同埋好多船務行印製票據、表格等。

到咗1946年鐘華接手陣，鐘嘅表叔胡金昌（時中大物理系主任）建議鐘改做體育用品以號召啲街坊強身健體唔做東亞病夫，於是乎商號開始賣埋啲體育用品。

1950年代初新以泰加工場打通咗同開越中學操場嘅圍牆，同學校免費提供籃球架、籃球、單雙杠等器材，仲搞埋跳高、跳遠沙池，代理埋體育比賽門飛，一度成咗民辦體育中心。新以泰仲先後研製咗中國大陸入邊第一個冇金屬充氣裝置嘅膠籃球同第一隻全膠鐵餅。

1952年新以泰改咗專做體育用品，設計同生產主供學校嘅體育用品似鉛球、鐵餅、球衫球褲等。喺1960年代初，廣州市各級學校嘅單、雙杠，籃球架唔少出自新以泰。

1956年新以泰畀公私合營，大躍進時期（1958年）新以泰喺北京路太平館對面開咗分舖，做咗四十年後，由於鋪址嘅僑房陸續收回而執笠。

1987年，新以泰原址起咗12層嘅新大樓，同港商一齊搞咗國際康體器材應用維修培訓中心。

交通

• 巴士：農講所站，經停：1，27，76a&76，102，107，108，125，243，517，864；夜班1，27，2，40，4，78，9。
• 地鐵：農講所站D口

出面網頁

• 新以泰体育用品