施事者偵測

施事者偵測（英文：agent detection）指人類唔清楚某件事發生嘅因由嘅時候（例如道門自動閂埋），會傾向認為背後有個施事者（有目的同有智慧嘅存在，例如人、靈體或者其它超自然力量）存在，而現實入面施事者可能存在，亦可能唔存在（例如只係一陣風）。 擬人論（anthropomorphism）亦係施事者偵測嘅表現，人傾向將模糊不清嘅嘢（例如雲）睇成人樣。

原因

演化優勢

唔少研究都會以演化優勢嚟說明人點解會有施事者偵測。 基本諗法係，當人類唔知前方危唔危險嘅時候，例如喺森林入口見到類似猛獸嘅腳印，根據施事者偵測，佢哋應該兜路走。因為假設事實上腳印係屬於草食動物，佢嘅成本只係兜路用多咗嘅時間。而如果個腳印真係屬於獅子，而佢哋走咗入森林，死亡風險就會大增。為咗提升生存機率，佢哋會兜路走。

根據錯誤管理理論（Error management theory），某啲認知偏誤（例如施事者偵測）係為咗適應環境而演化出嚟，唔係冇用或者完全係壞事。呢個理論假設面對唔確定因素嘅時候，由於唔知自己會唔會犯錯，人會思考做錯決定嘅成本，然後根據安全勝於後悔原則（better safe than sorry），下代價最低嘅決定。具體嚟講，判斷同現實有四個組合（認為有但其實冇、認為有而真係有、認為冇但其實有，認為冇而真係冇）。假設做錯判斷（即係第一同第三個情景），前者（假陽性）嘅成本比後者（假陰性）細好多，因為前者只係因為兜路而嘥時間同體力，但後者會導致死亡。面對唔對稱嘅成本，加上唔兜路所慳咗嘅時間同體力唔能夠抵銷呢個成本，兜路顯然係代價最低嘅決定，同時解釋到點解人傾向做假陽性判斷。

認知機制

關於背後嘅認知機制，Barret承接Guthrie有關研究，認為人擁有所謂hyperactive agent-detection device （HADD），令人過度敏感，以致成日錯估施事者存在。根據呢個講法，當情況越唔明確（例如環境越暗，資訊越少），潛在威脅就越大，為咗降低不確定性，人會更傾向錯誤噉假定施事者存在。例如有研究發現人感到敬畏嘅時候比較唔能夠忍受不確定因素，於是容易引發施事者偵測。不過有研究就有唔同嘅結論。

宗教相關

施事者偵測好多時會用咗嚟解釋點解人會信有上帝同其它超自然現象，相關討論成為宗教認知科學（cognitive science of religion）嘅主要課題。

其它