日產Civilian

日產Civilian; 日産・シビリアン; Nissan Civilian
	; 日產Civilian
又叫	五十鈴Journey（OEM，1993年－）
製造廠	日產汽車
邊道出	日本
製造年份	1959年—2021年2月
主要對手	三菱Rosa; 豐田Coaster/日野Liésse II; 日野Rainbow小巴; 五十鈴Journey（1993年之前）; 萬事得Parkway
規格
引擎	日產; 三菱4M50（2004-2007年）
波箱	棍波/自動波

日產Civilian係日本日產汽車出嘅一款小巴。

Civilian嘅生產可以追溯到1959年，當年日產Caball（日産・キャブオール）貨車嘅小巴版現身。呢隻小巴喺1962年改為就咁叫日產Echo（日産・エコー），1971年改叫日產Civilian。改名之後，Civilian喺1982同埋1999年加埋改過兩次款。

自1993年開始，有Civilian供應畀五十鈴，然之後以五十鈴Journey（いすゞ・ジャーニー）呢個名賣。

Civilian小巴除咗喺日本本土賣之外，亦有出口去亞洲同非洲多個地區。

生產史

1959年12月，日產推出Caball貨車嘅小巴版，代號KC42。小巴同貨車採用相同嘅底盤同驅動組件，汽油引擎係由英國柯士甸汽車開發嘅B系列國產化嘅日產1H型，車身由新日國工業（1962年改叫日產車體工機）喺京都生產。

1960年3月，Caball小巴跟隨貨車作小改款，代號GC140，引擎改為G型，車身嘅裝飾線亦稍作整理。1961年，Caball小巴開始稱為Caball Echo。

1962年，改配H型引擎，型號名改叫Echo，代號改為GC141。

1963年，Echo車咀改咗款，車身兩邊傍板設計都唔同咗。同年增設長陣版，初時屬於改裝車，第二年被列入產品目錄。

1964年初，Echo增設SD22柴油引擎選擇。同年底再作小改，車頭擋風玻璃改成一塊過，水箱網同泵把唔同咗。司機位車門大概喺1965年加設。

1965年10月，Echo改配H20汽油引擎，SD22引擎性能提升，車型代號GC142。

1966年8月，Echo跟隨Caball貨車作出第一次大改款，改配新款嘅日產車體工機（1971年改叫日產車體）車身，車型代號GC240。1969年4月，Echo開始有孖尾胎版。

1968年6月21號同埋1969年3月11號，先後有兩架長陣版第二代Echo喺名神高速公路意外翻側，事後都發現條直濕斷咗。後來查明係條一條過直濕喺行車期間共振，最終折斷，最終一條過直濕改成分開兩節。同年日本問題車之多受到社會關注，車輛召回制度被建立。

1970年，Echo車咀改款，車頭燈同埋水箱網連成一體。

1971年9月，車身設計有小改款，同時為洗刷因直濕設計問題導致嗰兩單翻車意外，而引起嘅負面形象，改名為Civilian，代號繼續係GC240。但包括香港在內嘅一啲地區繼續沿用Echo呢個名。

1973年，Civilian開始可以配ED30柴油引擎。

1976年，隨住Caball貨車大改款，Civilian亦作出小改款，代號改為GC340，同時取代咗王子Light Coach小巴嘅地位。

1979年，推出符合日本昭和54年廢氣排放標準嘅Civilian GC341，同時新增高車頂版。

1980年，Civilian開始可以配ED33柴油引擎，有啲車喺車身左前面增設安全車窗。

1982年8月，日產推出第二代Civilian，車型代號W40。由於Caball貨車已經停產，新版Civilian改為建基於Atlas 200、300系貨車，日產車體亦設計咗個新車身。佢可以配Z22S（汽油）或者ED33柴油引擎。喺生產嘅頭幾年，包括香港在內嘅一啲地區仍然稱之為Echo。

1984年7月，加入FD33T渦輪增壓連直接噴注柴油引擎。

1988年5月，Civilian嚟一次小改，車咀設計變咗，亦開始可以揀氣墊避震。日本本土版唔再配汽油引擎，而FD33T引擎亦俾TD42引擎取代；1990年6月連ED33引擎都俾ED35取代。

1993年，高車頂版嘅車頂輪廓變咗，改為由擋風玻璃頂部開始向後升高。同年Civilian亦開始以代工生產形式畀五十鈴賣，是為五十鈴Journey，取代咗五十鈴自家嘅Journey小巴設計。

1994年，由Autech Japan將Civilian改裝成仿古凸頭嘅「Classic Bus」開賣。

1995年8月，Civilian再嚟一次小改，車咀設計又變咗，引擎選擇多咗隻TD42T（加咗渦輪增壓嘅TD42）。另外亦有出四驅車版，沿用五十鈴Elf貨車嘅驅動組件同埋4HG1引擎。

1999年2月，日產開始賣第三代Civilian，車型代號W41。車身係新設計，可以揀TD42、TD42T或者L28S（汽油，只限出口）引擎。喺最頭嗰幾年，仍然有仿古凸頭「Classic Bus」同埋四驅版（繼續用五十鈴Elf貨車嘅驅動組件同埋4HG1引擎）生產。

2000年，有一架石油氣引擎嘅Civilian運咗去香港試車^[1]，不過並唔成功，Civilian亦正式撤出香港市場。

2001年，日產車體嘅小巴生產分拆咗畀新嘅子公司Auto Works京都。

2002年10月，Civilian嘅車頭唔再印「NISSAN」字樣，冇尾門版本嘅「CIVILIAN」字樣亦由車窗左下角向下移落車身上面。同時TB45E汽油引擎取代咗L28S引擎。

2003年開始，配TB45E改引擎嘅天然氣版Civilian出咗一段短時間。

2004年3月，日產向日本本土市場供應TB45E汽油引擎嘅Civilian。同年9月開始，TD42T引擎亦唔再配落Civilian度，日本本土版車咀改用金屬鍍層水箱網。

2004年11月至2007年8月出嘅日本本土柴油版轉咗用三菱4M50引擎，呢段期間以五十鈴Journey個名賣嘅Civilian冇柴油版賣。之後近一年日本本土冇柴油版Civilian賣。

2008年6月，日本本土版Civilian又有返柴油引擎，今次嘅型號係ZD30DDTi。但到咗2011年7月，日本本土柴油版Civilian再一次被廢，此後得出口版繼續有柴油版賣。

2015年開始，ZD30DDTi柴油引擎嘅Civilian重出江湖，但只限出口，並完全取代TD42引擎。

2021年6月，日本本土版Civilian停產，讓出生產線畀NV350。