星室法庭

星室法庭（英文：Star Chamber）係英國歷史上嘅一個司法機構，喺1487年創立，由於地點係西敏宮入邊個屋頂有星形裝飾嘅大廳，就有咗呢個名。個法庭係亨利七世同亨利八世時代，為咗加強君主專制，箝制言論自由而創設嘅法庭，喺斯圖亞特王朝嘅時期，係專登對付同國王唱反調嘅加爾文派清教徒。因獨斷行使權力同非法擴權，而廣受詬病。到咗1641年7月清教徒革命嘅前夕，由長期議會通過咗法案，取締咗個法庭。

前身

早期英格蘭國王嘅諮議會，就喺「星室」度處理啲政務。到咗亨利七世、亨利八世嘅時候，重組咗呢個一機構，仲授予咗司法管轄權，規定埋法官嘅組成人選。

特點

喺法庭開審時，訴訟雙方都冇權聽審，聽證亦唔使證人到場，而採用文字去傳達，形同秘密審判。訴訟雙方並冇一般普通法法庭所認可嘅權利，亦冇設陪審團，一切係聽法官嘅心證。而法庭係有各種刑罰同刑求嘅權限，但冇包死刑。

影響

呢個法庭同英國樞密院、英國高等法院等機構，構成過史上君主專制最重要嘅國家機器，特别懲處啲出版商嘅時候係好鬼積極。美國新聞史學家埃默里話呢個係「英國新聞紙出現前一長段歷史入邊禁止自由發表意見嘅又一障礙」。英國唔少新聞界先驅，都受過呢個機構嘅傳訊、折磨或監禁。星室法庭亦成為英國專制制度嘅象徵，「星室法庭」喺解散咗之後，仲成為咗專斷司法嘅同義語。但星室法庭對圈地運動嘅態度，則始終以法律角度去阻止。