時代力量中華民國政黨,而家係全國第四大政黨,由林昶佐林峰正林世煜邱顯智等人創辦。

時代力量嘅前身係社運團體公民組合,佢喺2014年成立,但係好快因為意見不合,團體入面分成兩個派系,分別係林峯正為首嘅派系同范雲為首嘅派系。2015年1月,林峯正派系就成立咗時代力量,而范雲嗰邊就成立咗社會民主黨,兩派正式分道揚鑣。

2016年台灣立委選舉,時代力量派出12人出戰區域立委,另外有6人入咗不分區名單,當中時代力量喺3個地方選區成功贏出,呢3區都係由民進黨禮讓嘅,另外時代力量攞到6.1%政黨票,可以有2席不分區立委,有5席嘅時代力量一躍成為台灣嘅第三大黨。

時代力量雖然立場親綠,但係質詢同樣屬於綠營嘅民進黨政府一樣唔手軟,例如一例一休噉,時代力量一直都反對由民進黨提出嚟嘅方案,喺立法院更加強力阻撓議案通過,兩者嘅關係開始破裂。[1][2]到2019年,時代力量對應唔應該同民進黨合作出現分歧,黃國昌、徐永明等人主張繼續監督藍、綠,時代力量唔可以成為「小綠」,而另一派(以洪慈庸、林昶佐為代表)就覺得時代力量應該要繼續同民進黨合作,對抗國民黨。與此同時,黃國昌揭發出國安局私煙案,時代力量同民進黨衝突加劇,同時牽動黨內黃國昌路線同親綠派嘅不和。到咗8月1號,時力黨內討論係咪要支持蔡英文連任總統,點知冇結果。當日下晝,早早公開支持蔡英文連任嘅林昶佐就宣佈退黨。到8月8號,不分區立委高潞以用因為喺7月嗰陣畀綠黨揭發助理用職務以便申請政府補助,結果被踢出黨[3],時力立委數目只係淨低3個。到12號,時代力量嘅主席邱顯智宣佈辭職,之後洪慈庸喺13號亦都宣佈退黨。

時代力量經過大地震之後元氣大傷,當時嘅立委人數只係得返2個,連建立黨團嘅最低要求都做唔到,同時黨入面親綠派勢力大減,黃國昌路線成為主流。當時更加傳出因為不分區名單入面所有女性都退咗黨而要令議席懸空,後來證實排名第3嘅鄭秀玲未完成退黨手續,喺補交黨費之後就可以遞補上去,解決咗時力黨團嘅生存危機。

2020年台灣立委選舉,時代力量派出5人出戰區域立委,不分區名單就有11人。其中,黃國昌由地方選區轉戰不分區,排喺不分區名單嘅第4名,呢個位置屬於當選嘅邊緣,佢希望藉此拉動時代力量嘅選情,最後時力喺不分區贏到3席,黃國昌就咁落選,而區域立委方面,喺冇民進黨禮讓底下,出戰嘅5人全部輸晒。

2020年7月尾,台灣檢察人員突然大規模搜查立法院,同纏繞咗十幾年嘅台灣SOGO爭奪案有關,調查涉及6個立委同前立委,當中包括時代力量嘅徐永明,佢懷疑收咗200萬賄款。由於時代力量主打清廉,加上徐永明當時係黨主席,結果時力聲勢受挫,徐永明最後退出時力,同日台北市兩個議員因為不滿受到黨內「放話文化」攻擊,宣佈退黨。[4]到8月時力改選決策委員嘅前夕,有一段屬於黃國昌錄音流出,當中黃國昌指責苗栗縣議員曾玟學走票,搞到佢嘅親信徐永明喺選對會落馬,重話如果冇佢將曾玟學擺入配票名單,曾氏根本唔可能當選,曾玟學話黨入面居然冇人夠膽批評呢件事覺得心寒,決定退出時力。[5] 幾日之後,高雄市議員黃捷個妹黃蓉爆出自己原先喺6月申請入黨,之不過佢到投票嗰陣先發現自己重未做到黨員,不過系統又顯示佢已經投咗票,所以佢懷疑自己做咗人頭黨員,黃捷因為呢件事決定退黨。

參考

  1. "一例一休-擋不了《勞基法》 時力退出表決向勞工道歉-民視新聞 - YouTube". www.youtube.com. 喺2020-08-24搵到.
  2. "一例一休-一例一休今初審 徐永明嗆民黨違反議事-民視新聞 - YouTube". www.youtube.com. 喺2020-08-24搵到.
  3. Storm.mg (2019-08-08). "「沒有一毛錢落進自己口袋」高潞.以用落淚:助理已全數解編調查,將採取法律救濟-風傳媒". www.storm.mg (中文). 喺2020-08-24搵到.
  4. "怒轟「放話文化、伐異」黃郁芬、林穎孟飆淚退出時力 - YouTube". www.youtube.com. 喺2020-08-24搵到.
  5. "「沒有我支持你選的上嗎」遭錄音 黃國昌回應曾玟學退黨:很難過 | 政治". 新頭殼 Newtalk (中文). 2020-08-24. 喺2020-08-24搵到.