智商嘅遺傳度

智商嘅遺傳度（英文：heritability of IQ）係遺傳度研究（指針對「人嘅各種特徵有幾受遺傳因素影響」嘅研究）上嘅一條問題，响先天定後天等嘅爭論當中相當受關注。

理論基礎

睇埋：智能、智商同遺傳度

• 智能（intelligence）係一種心理特性，大致上係指一個個體學習同諗嘢嘅能力有幾勁，智能高嘅個體就算係「聰明」；
• 而智商（IQ）係一個可以透過智商測試（泛指設計嚟量度智能嘅架生）得出嘅數值，反映咗一個個體嘅智能有幾高，智商數值正常係 100 分，數值愈高就表示嗰個人智能（相對於平均嚟講）愈高；
• 智商嘅遺傳度就係指針對「智商有幾受遺傳因素影響」而做嘅研究。

一般認為，智能對一個人「成就可以去到幾大」有深遠嘅影響，於是廿世紀嘅心理學界就有好多人出咗噉嘅疑問：

「

如果智商係由先天因素決定嘅，噉係咪表示一個人『成就可以去到幾高』都係由先天因素話事嘅呢？

」

遺傳度研究表示，喺咁多種心理特性裏面，智商算係遺傳度比較高嘅：响 2015 年有研究者試過做咗份元分析，分析咗打前嗰 50 年做過有關智商嘅孖胎研究，發現智商嘅遺傳度去到成 57% 咁高，而到咗 2020 年，心理學界基本上一致同意，智商係有相當高嘅遺傳度嘅。

查理斯·達爾文（Darwin；左）同佢個半表弟法蘭西斯·高爾頓（Galton；右）嘅相；達爾文對現代進化論作出咗重大貢獻，而高爾頓就俾人譽為心理測量學之父－兩表兄弟都係影響力重大嘅科學家，都係好聰明嘅人。佢哋家族係咪零舍有「聰明基因」呢？

年齡因素

值得一提嘅係，智商嘅遺傳度仲會隨年紀而上升：到咗成年期嗰陣，養兄弟姊妹喺智商上嘅統計相關係 0 咁滯－意思即係話是但搵對養兄弟姊妹，兩個人都係大人，佢哋之間喺智商上嘅相似性多數唔會高過「是但搵對陌生人，兩個人之間嘅智商相似度」，相比之下，成年期親生兄弟姊妹喺智商上嘅統計相關會去到成 0.6 咁高（算係幾高嘅數值），而成年、自細分開養嘅同卵孖胎喺智商上統計相關仲有成 0.74 咁高；同時呢啲遺傳度數值喺細個嗰陣會唔同－細個嗰陣養兄弟姊妹嘅智商相似性高啲，而同卵孖胎嘅智商相似性冇咁高。

噉講即係話，成年期嘅智商好大程度上取決於先天因素，就算一個細路做咗某啲嘢提高自己智商，佢大個咗之後都好可能會返去原本嘅智商－即係例如一個智能平均嘅 10 歲細路做咗啲嘢，令自己嘅智能變成「高過平均少少」，大個咗好有可能會變返平均咁高嘅智能。呢類噉嘅研究對教育等嘅工作嚟講有相當嘅啟示。

睇埋

• 先天定後天
• 智能放大
• 統計相關
• 人類智能嘅進化
• 神經科學同智能
• 優生學

文獻

• Scott Barry Kaufman (October 17, 2013). "The Heritability of Intelligence: Not What You Think". Scientific American. Retrieved 20 October 2013.