曾大屋

曾大屋

曾大屋（曾讀增，Tsang Tai Uk），正名叫山下圍或者山廈圍，係香港沙田一圍。響博康邨南面。呢條村係1867年起好，係條姓曾嘅村，所以叫曾大屋，又或者曾氏大屋，曾家大屋。村民係客家人，開村祖係曾貫萬。喺2009年12月18號被評為香港一級歷史建築。

曾大屋係典型嘅客家圍村之一，係曾氏家族嘅根據地。佢喺1848年開始起，起咗廿年先至起好。大屋係用花崗石、青磚同埋實木嚟起嘅，係沙田保存得最完整嘅粵東客籍圍村。 曾大屋係長立方形嘅，總共有三進，屋同屋之間有通道同埋天井相連；圍牆上有排列整齊嘅槍孔同瞭望孔，圍嘅四角有更樓同炮樓，用嚟防禦外敵入侵。北面圍牆有3個入口，門頂係圓拱形嘅，正中嘅正門可以直接通往祠堂。祠堂位於最後一進排屋嘅中心，係舉行祭典同儀式嘅地方。