曾楊殺人案

曾楊—倪青青電鋸兇殺案响2022年2月7號喺中國貴州省貴陽市白雲區融媒體中心發生，响2023年2月23號喺貴陽市中級人民法院開審；死者叫倪青青，兇手叫曾楊（簡化字：曾杨），兩個都係喺嗰處做嘢嘅男記者，本身有牙齒印；過程似乎係佢哋喺嗰日為咗啲唔算好重要嘅事嘈咗場大交之後，後者帶咗電鋸傍刀入去辦公室，鎖門，跟住用呢啲工具，當住五個女同事嘅面殺死前者兼整到佢肢離破碎。

縱使其過程駭人聽聞，倪青青個老母敖林嬋（簡化字：敖林婵）亦由2022年3月1號開始喺網上持續公開申冤，希望政府處死曾楊，唔好徇私枉法，但係法院長期將呢單嘢擺埋一邊，大陸傳媒亦對其置之不理，只有大陸網民將相關信息流傳；到咗2023年3月，大陸自媒體紛紛轉述此事；2023年4月時，好多外地傳媒亦一窩蜂噉報導……公眾因此猜測噉係由於疑犯乃中共官二代，而死者一家為尋常老百姓，彼此地位懸殊，於是政府嘅力量被動用嚟封鎖消息及拖延司法程序。