朗誦
朗誦（粵拼：long5 zung6；英文：public recitation）係文學、歌唱、戲劇三種藝術嘅結合，「朗」係明亮、清澈嘅意思，「誦」係合乎節奏嘅誦讀方法。朗誦喺係朗讀嘅基礎上，加強各種技巧嘅運用，例如運用傳神嘅語調、鮮明嘅節奏、充沛嘅感情、豐富嘅想像、細膩嘅表情、美化嘅動作等配合，將作者嘅心聲重現於聽眾面前。朗誦可以分為獨誦（個人）、合誦（2-9人）、集誦（10人以上）形式。
簡介 編輯
朗誦係以美妙嘅聲音將文章表達出嚟，朗誦者誦讀文章嘅時候，以清晰、圓潤嘅腔音，配合句子音節嘅高低、強弱、輕重、緩急、停連而構成一定嘅節奏同語調，再加上正確嘅字音、清楚嘅讀句、語氣嘅配合、自然嘅聲調，就能夠將作品嘅內容同佢蘊涵嘅思想感情結合起嚟，傳達畀聽眾，令佢哋接受同欣賞[1]。
技巧 編輯
朗誦要表達得恰當，朗誦者必須對作品有深入嘅理解，掌握文章嘅基本內容，概括中心思想，分析字、詞、句、修辭技巧同篇章結構，更加要讀準字音，揣摩作者嘅態度同文章嘅感情色彩，領會具體感受，然後可以把握基調。實際進行朗誦嘅時候，除咗要注意停頓同相連、重音同輕音、速度同節奏、語氣同語調等聲音技巧之外，亦要注意眼神嘅運用、面部嘅表情、動作嘅配合同台風、儀態等。
眼神運用 編輯
朗誦嘅時候身體各部分器官，都有受到限制，所以要準確貼切表達想像，只有盡量利用最靈活而最唔受限制嘅眼睛，運用眼神同聽眾溝通交流，加强表達效果，集中凝想、進入詩境之中[2]。
面部表情 編輯
朗誦係聲情嘅藝術，朗誦者除咗運用各種聲音打動聽眾之外，亦必須將深厚真摯嘅感情灌注於字裏行間，將文章情感突出嘅地方，用面部表情加以表達出嚟。
手勢同動作運用 編輯
- 手勢同動作，必須同文章緊密配合，唔可以生硬堆砌，以免產生反效果。
- 手勢同動作要少而清楚，適當自然，並且優美配合。
- 動作範圍要細，盡量喺胸前，手臂伸得太遠就會缺乏力量，垂得太低就唔能夠引起聽眾嘅注意。
- 腰部以下盡量唔好有動作，尤其是對腳；一嚟破壞美感，二嚟影響呼吸。
- 身體唔應該經常轉移位置，以免分散聽眾嘅注意力；只有喺段落嘅大停頓或文意轉折嘅地方先至可以轉移位置，以表示進入另一階段或層面。
- 動作要精心設計，喺出聲之前要表現出嚟，以起暗示同引導嘅作用。