期數列外

期數列外（韓文：기수 열외），中文又譯做期數例外，係源自韓國海軍陸戰隊嘅名詞，指部隊嘅一種集體霸凌現象，亦都係一種體制之外嘅懲罰機制，類似英文嘅「紅色條規」（Code Red）。

具體型態

相對於「期數」次序，即係陸戰隊軍人用入伍年期區分長幼、決定地位嘅不成文規矩，「期數列外」係表示受到孤立嘅特定隊員，俾隊友排除喺期數次序之外、唔按前輩或者後輩嘅資格對待，俾老兵同新兵蔑視、欺侮，甚至虐待。加上傳統上注重長幼嘅韓國文化，「期數列外」意味住受到排擠嘅士兵嘅地位唔被團體認同，形成人格嘅屈辱，有少數重會導致嚴重嘅暴力事件。 期數列外現象響2011年7月江華島槍擊案發生之後，俾韓國國防部稱為「軍中惡習」；國防部長金寬鎮亦都響同一個月向大韓民國國軍幾個將級指揮官下令調查部隊入面類似嘅虐兵現象。

根據韓國軍方人權中心響2011年發表嘅調查結果，期數列外除咗排擠、孤立之外，可能涉及辱罵、毆打等等嘅行為，執勤表現唔多好又或者唔適應軍旅生活嘅士兵好容易成為受害對象。

相關嘅事件

2011年3月，韓國國家人權委員會公布咗陸戰隊內部發生嘅一尐不當事件，包括有老兵打新兵、迫佢哋食嘢等等；同一年6月，又公開咗一單「期數列外」嘅案例，有新兵因為無對老兵講敬語，而受到羞辱。

2011年7月，江華島嘅海岸哨所發生咗槍擊事件，有一個上兵不堪被後輩打同孤立，偷咗支步槍，響宿舍開槍射擊、又喺倉庫引爆手榴彈，造成4個人死、自己同另一個士兵受傷。同一個月，一個姓鄭嘅一等兵吊頸自殺死咗，根據遺書嘅內容，顯示受到期數列外嘅霸凌可能係佢求死嘅原因。