李卓敏

李卓敏博士，KBE（英文：Dr Li Choh-ming，1912年 2月17號—1991年 4月21號）係美籍華裔教育家、工商管理學家同經濟學家，係香港中文大學創校校長，1964年2月至1978年9月在任。

生平

李卓敏喺廣州出世，早年喺廣州培英中學同金陵大學讀書，之後去咗美國柏克萊加州大學，先後攞到文學士、文學碩士同哲學博士學位。佢喺中日戰爭嗰陣喺天津南開大學、國立西南聯合大學同國立中央大學教過經濟學，並做過國民政府中央設計委員會委員同考察聯絡專員，戰事末期同戰後擔任過行政院善後救濟總署副署長、駐聯合國亞洲暨遠東經濟委員會常任代表同行政院善後物資保管委員會主席等職。1951年，佢返母校加利福尼亞大學柏克萊分校，出任該校工商管理學教授，並兼任國際商業系主任同中國研究所所長。

1962年，李卓敏應港府邀請擔任富爾敦委員會委員，就香港設立一間中文大學提供深入嘅意見。1963年，佢獲選為香港中文大學創校校長，重獲得加州大學校方畀10年特假，以便專心喺中大嘅創校工作。佢响任內，佢好快就為中文大學訂咗清晰目標，銳意令中大成為一間屬於唐人社會嘅國際大學。

由接受任命到卸任嘅15年期間，佢得到三次冧莊，期間佢積極將中大發展做一家「研究型」大學，大學各學系同埋學生人數亦有長足發展。响佢嘅經營之下，位於沙田馬料水嘅中文大學校址，得以由原來嘅荒山野嶺轉化成為一座規劃井然有序嘅「山城」，對中大嘅日後發展奠定咗重要嘅基礎。

卸任後，佢退居加州柏克萊，期間著有李氏中文字典，直到1991年4月21號因病去世。