林志釉

林志釉，香港律師兼病人權益工作者，而家係病人政策連線主席。

早年生涯

喺2003年，佢被誤診感染沙士，接受類固醇治療，幾乎導致骨枯外，出院後屢受歧視，更慘被律師樓解僱。之後佢決定投身病人組織。

部分關注議題

就新冠肺炎疫苗問題，政府處理醫療豁免證明（俗稱免針紙）嘅手法引起爭議，甚至採取法律行動針對一啲醫生。林志釉亦有關注有關議題，批評政府以行政手段「廢除」判決「蔚為奇觀」。

另外，就改革醫委會而提出嘅《醫生註冊（修訂）條例草案》，佢認為醫療界出現咗醫生保護主義強權，不時同當時醫學界立法會議員梁家騮針鋒相對。

佢亦唔支持引入海外醫療人員嘅建議，認為引入人員質素參差，而且引入本地護士中大部分或來自國内，可能唔識睇英文嘅醫療紀錄，做法忽視病人安全。