榫

榫，讀 seon²，係木匠用來接駁木塊嘅技術。中國傳統木匠要駁埋兩嚿木嘅時候，會喺接駁位分別造出一凹一凸、大細配合嘅形狀，叫做【榫口】。榫口位一凹一凸咁夾埋，就可以令兩嚿木咬實。有人話，【入榫】呢種接駁技術，穩陣過用鐵釘揼埋兩嚿木好多！所以，雖然因為入榫嘅技術要求高，工序又繁複，令到用入榫方式造出來嘅木器（好似：檯、椅、櫃、櫳）比較貴，但係都有人願意畀多啲錢來買，因為入榫造嘅木器襟用、實淨好多。