榮華樓 (廣州)

  呢篇嘢講嘅係廣州荔灣嘅榮華樓。

• 想搵香港元朗嘅榮華樓，請睇「榮華樓 (香港)」。
• 想搵香港灣仔嘅榮華樓，請睇「大榮華酒樓」。

榮華樓（注意「華」字有變音，粵拼：wing4 waa2 lau4）係中國廣東省廣州市嘅一間好出名嘅老字號酒樓，喺荔灣區龍津東路708—712號，龍錦大廈對面。呢間酒樓喺1876年開業，雖然話佢係廣州入面比較少見到超過1個世紀都重響度嘅其中一間老字號茶樓，但佢唔係文物保護單位。呢間酒樓比而家有嘅老字號酒樓——蓮香樓同陶陶居重要開得早。

榮華樓
廣州市歷史建築
喺邊	廣州市荔灣區
登錄	2016年11月16號

史

呢間酒樓最先喺1876年嘅西關地區，龍津東路嗰邊開業，嗰時間樓重係一棟磚木結構嘅樓。到咗1936年嘅榮華樓60週年慶典嗰陣，就改成2層高嘅鋼筋石屎樓宇；中華人民共和國建立政權後嘅1956年2月，因為當局嘅公私合營而被充公。喺1960—1968年（尤其係文革時期嘅破四舊嗰陣）試過2樓嗰邊唔開，就搞咗西區商業局飲食服務管理部嘅辦公地區，嗰時凈係得返地下嗰邊搞茶飯市。而文革時期，呢間舖頭都裝修咗好幾次，搞到之前古色古香嘅風格都冇咗，變成係新時代嘅裝飾。嗰時嘅榮華茶樓，四邊牆都髹咗白色，而地下大廳同2樓都擺嗮大圓台，而方台係屬於散座，甚至唔整卡位嚟搞到個廳好大、好光、甚至係空氣流通噉。到咗1978年，榮華樓恢復咗生產佢哋嘅傳統月餅，重搞咗「榮華富貴月」出嚟而俾街坊歡迎咗佢。

到咗1983年，榮華樓又重新調整咗廳堂嘅佈置，重恢復咗宵夜夜市（21:00—00:00）。而經營方面都搞咗好多唔同嘅嘢出嚟，價錢都好平，有好多種燒賣同煲仔系列、生滾粥品、各式小炒等，重恢復咗「問位點茶」，所以生意好旺。1985年就整大咗個二樓橫廳，就將原嚟放雜物嘅空木樓改成廳房（而家嘅牡丹廳）嘅同時重加開咗間餅屋。

喺1993年，榮華樓再裝修，從之前嘅2層樓加到4層樓，重整咗10幾間有冷氣、卡拉OK嘅廳房出嚟。到咗1994年1月23號，榮華樓重新開業。

2013年8月26號突然停業，嗰時唔少市民估佢係執笠。卒之喺2014年1月份重新開返。

2015年8月20號，消失咗2年嘅粵曲喺榮華樓重新出現返，但位置變咗喺酒樓嘅3樓。

2016年11月16號，廣州市人民政府正式宣佈將呢間嘢列為歷史建築。

攷

• 广州荣华楼停业 沉寂待重生？ 大洋網 2013-08-08
• 荣华楼旧事 21CN 2013-12-06