機長，即係飛機裏面，飛機師之中嘅阿頭，係飛機飛緊嗰陣，運作同安全負最大責任嘅人。機長制服上面，繡咗四條黃或者白柴，而頂帽亦都會零舍唔同。
英文Captain一詞係源自泛美航空總裁胡安·特里普（Juan Terry Trippe），事關當時泛美有好多架水上飛機，佢就將「船長」一詞移植到飛機上，稱機內嘅第一駕駛人做「Captain」。
喺西方國家，通常對機長稱為pilot in command，簡稱PIC。
喺雙人坐嘅民航機、運輸機、轟炸機上，機長嘅座位喺駕駛艙左側；喺雙人坐嘅戰鬥機上，機長嘅座位喺駕駛艙前方；而喺雙人坐嘅教練機同武裝直昇機上，機長嘅座位喺駕駛艙後方。
