沖繩島

沖繩島（粵拼：cung1 sing4 dou2；琉球文：沖繩〔沖縄〕／ウチナー ^Uchinaa；日文：沖縄本島/沖縄島／おきなわほんとう/おきなわじま ^{Okinawa-hontō/Okinawa-jima}）係日本琉球群島最大嘅島，琉球話俗稱地下（dei6 haa6；琉球文：地下／ジジ／ジチ ^Zizi／Ziti）或大地（daai6 dei6；琉球文：大地／ウフジ／ウフジー ^{Uhuzi／Uhuzii}）。全島面積1206.96 km²，係日本第七大島，排喺本州、北海道、九州、四國同埋北方四島裏面嘅擇捉島、國後島之後。呢度曾係沖繩島戰役嘅戰場，係二戰時美軍同日本打嘅咁多仗中傷亡最大嘅一次。

日本沖繩縣所轄諸島

之後日本向盟軍投降，美軍佔領呢箇島到1972年5月15號。之後主權畀咗日本，而美軍根據美日安保條約喺島上保留咗嘉手納空軍基地，直到而家重駐軍。

島上有沖繩縣府那霸。2009年，島上人口138.5萬，包括沖繩本地人、日本人、外國人（包括美軍共軍屬）。島嘅北部好少人，而南部嘅人口密度好高，南部包括咗那霸市同沖繩市，島上人口亦集中喺呢兩個市一帶。島上嘅琉球國遺跡經已畀UNESCO收錄到世界遺產名錄。

島嘅中南部由出水嘅珊瑚礁形成，北部主要係火山岩成份。南部因為有石灰岩溶蝕，產生好多鍾乳洞，其中最出名嘅係那霸西南全長5公里（一般開放890米）嘅玉泉洞。

全島氣候亞熱帶，令北面嘅森林生得好密，每年春末入雨季。海岸線有476公里長，最高點響與那霸嶽，有成503米高。