法利賽人同稅吏嘅比喻

法利賽人同稅吏嘅比喻係耶穌講嘅一個比喻，記載喺《新約聖經》《路加福音》第18章第9至14節。

聖經譯文

「	耶穌向嗰啲自以為義而藐視其他人嘅人講咗呢個比喻：「有兩個人去到聖殿祈禱，一個係法利賽人，一個係稅吏。法利賽人單獨企喺度，自言自語噉祈禱話：『上帝呀，我多謝你，我唔似其他人勒索、唔道德、姦淫，更加唔似呢個稅吏。我每個禮拜都禁食兩次，又奉獻全部收入嘅十分之一。』稅吏遠遠噉企喺度，連抬起頭望天都唔敢，淨係捶住胸話，『上帝呀，開恩可憐我呢個罪人！』我話你哋知，呢兩個人返去嘅時候，喺上帝眼中嘅義人係嗰個稅吏，唔係嗰個法利賽人。因為自高嘅人，必定會降為卑微；自甘卑微嘅人，必定會升為高。」	」
——《路加福音》18章9至14節

解釋

呢個比喻嘅重點指出祈禱應有嘅態度。比喻裏面有兩個人物：一個係喺社會被人認為係敬虔嘅法利賽人；另一個係令人睇唔起受羅馬政府僱用嘅稅吏。法利賽人嘅祈禱，首先提到自己冇做到嘅壞行為，再次強調自己嘅宗教虔誠行為，例如一個禮拜禁食兩次同奉獻十分之一。法利賽人祈禱嘅內容都係事實，亦都以感謝神開始，但係佢祈禱嘅態度卻係錯誤嘅，因為佢沾沾自喜，自以為義。佢並冇感到自己唔配得，反而係噉大讚自己嘅好行為，佢認為上帝必定會因為佢所行嘅美德而稱佢為義。稅吏祈禱嘅態度同言語，卻同法利賽人成為對比。稅吏嘅祈禱有一種悔罪感，佢覺得自己唔配得連抬起頭都唔敢。佢為自己嘅罪捶胸悲傷噉祈禱。「捶胸」表示憂愁悲傷。稅吏嘅禱詞好簡短：「上帝呀，開恩可憐我呢個罪人！」佢謙卑噉求上帝赦免同憐憫，因此佢嘅祈禱得到悅納，並且得到上帝接納佢係義人。