法蘭茲公爵 (拜仁)

  提示：呢篇文講嘅唔係法蘭茲王子 (拜仁)或法蘭茲公爵 (薩克森-科堡-薩費爾德)。

法蘭茲·馮·拜仁（Franz von Bayern，1933年7月14號—），全名法蘭茲·博納文圖拉·艾達畢·瑪麗亞·荷索·馮·拜仁（Franz Bonaventura Adalbert Maria Herzog von Bayern），拜仁、法蘭克尼亞同士瓦本公爵，維特爾斯巴赫王朝現任領袖，同時亦係德國、英國王位覬覦者，佢嘅支持者多數叫佢做法蘭西二世（Francis II）。

法蘭茲
拜仁公爵
維特爾斯巴赫王朝領袖
在位	1996年7月8號 –
前任	艾伯列特公爵
占士黨王位覬覦者
在位	1996年7月8號 –
私人明細
皇族	維特爾斯巴赫王朝
父	艾伯列特公爵
母	瑪麗亞·馮·特拉科什乾
出世	(1933-07-14) 1933年7月14號  納粹德國拜仁州慕尼黑
宗教	羅馬天主教
出世名	羅馬天主教

生平

1948年嘅一張相，由左數起係阿爺魯普雷希特、老豆艾伯列特、法蘭茲佢自己

法蘭茲1933年7月14號響慕尼黑大學醫院出世，係拜仁王子艾伯列特公爵同第一任老婆瑪麗亞·馮·特拉科什乾共同嘅第一個仔，拜仁最後一位國王路德維希三世嘅後人。一開始，法蘭茲嘅地位並唔畀王室接受，因為老豆同阿媽係貴庶通婚、違反拜仁王室規定，後嚟阿爺魯普雷希特承認艾伯列特同瑪麗亞嘅結婚，法蘭茲先至做到王子。

1939年，拜仁王室為咗逃避納粹德國嘅追殺而流亡，老豆艾伯列特帶住一家大細去到匈牙利布達佩斯。去到1944年，納粹德國佔領匈牙利，艾伯列特一家大細、包括法蘭茲走唔切畀蓋世太保捉到，被關響集中營，先後轉到薩克森豪森集中營、弗洛森比格集中營、達浩集中營，1945年畀美軍放咗出嚟。

二戰之後，法蘭茲接受咗本篤會嘅教育，仲響慕尼黑大學同蘇黎士工商業學院讀工商管理系。佢識得英文、法文、德文同匈牙利文。

1996年，老豆艾伯列特過身，作為大仔嘅法蘭茲繼任成為拜仁、法蘭克尼亞同士瓦本公爵，萊茵行宮伯爵，同埋維特爾斯巴赫王朝領袖。占士黨成員叫佢做法蘭西二世（Francis II），認為身為斯圖亞特王朝後人嘅佢，先至係英國國王。

佢對科學同藝術方面好感興趣，對現代藝術有一定貢獻。佢將自己嘅藝術珍藏，就好似約瑟夫·博伊斯、基奧格·巴澤利茨嘅早期作品，永遠租畀慕尼黑現代美術館。另外，佢仲係好多藝術、教育同宗教機構做嘢：慕尼黑大學世襲評議員、拜仁科學同人文學學會榮譽會員、慕尼黑工業大學榮譽評議員、路德維希-馬克西米連大學監理會成員、拜仁天主教學會委員會和學會管理處成員、哲學高等學校監理會成員、卡爾·伯姆基金會榮譽協會會員、拜仁人口基金會監理會成員、舊美術館創建者協會主席、現代美術館基金會贊助人等。1996年，佢攞到美國賓夕法尼亞州聖-文森學院榮譽博士。佢響2003年攞到Duncan Phillips 獎。基於佢對藝術嘅充分理解，佢獲邀出任紐約現代藝術博物館國際理事會主席。

法蘭茲響慕尼黑，2012年攝

身為拜仁王室領袖，佢亦係聖-休伯特騎士團團長、聖佐治騎士團團長、馬耳他騎士團執行官同埋奧地利金羊毛騎士團成員。

2013年，佢響施萊斯海姆宮搞自己八十歲生日派對，其中出席嘅有拜仁時任州長霍斯特·施海佛。

法蘭茲到依家都未結婚，目前自己一個人住響寧芬堡。由於法蘭茲冇仔女，所以王朝領袖一職將會由佢細佬馬克斯·伊曼紐繼承；不過馬克斯得四個女，但拜仁王朝首領呢個位係傳仔唔傳女，所以當馬克斯死後，個位會傳畀堂細佬柳波德（柳波德個阿爺法蘭茲王子，係法蘭茲阿爺魯普雷希特嘅細佬）。

屋企

法蘭茲冇結婚、冇仔女。

2021年6月，法蘭茲同佢同性伴侶湯馬士·格林瓦爾德（Thomas Greinwald）影相，由荷蘭攝影師艾溫·奧拉夫影。佢係第一位公開自己係同性戀嘅歐洲王室領袖。