維基百科

泰國少年困山窿意外

泰國少年困山窿意外喺2018年6月23號發生，泰國清萊府一隊少年足球隊13人喺泰國第4大山窿「睡美人洞」（Tham Luang Nang Non）探險，因為落大雨、山窿水浸而失蹤。泰國政府派咗大班人去搜救，英國、美國、中國、澳洲等國亦有派救援隊幫手。

泰國少年困山窿意外
喺洞穴入口嘅救援人員同設備
日期2018年6月23號 (2018-06-23) – 2018年7月10號 (2018-07-10)
地點泰國 泰國清萊府睡美人洞（英文：Tham Luang Nang Non）
坐標20°22′21″N 99°51′03″E / 20.37250°N 99.85083°E / 20.37250; 99.85083
起因強烈季風造成嘅暴雨淹沒山洞
結果失蹤9日後12位少年同埋教練搵返，[1]，最終全部成功救出山窿
死亡人數1個潛水員

7月2號，足球隊失蹤9日後，英國潛水員喺山窿好深嘅地方搵到所有失蹤者，個個都冇事。但係撞啱雨季，好難將佢哋全部救出[2][3]。

7月8號晚，政府展開第一波救援行動，4個少年甩難。用前後包夾嘅方法，兩個泰國海豹部隊隊員帶一個少年，潛水出洞[4][5]。7月9號，第二波救援行動救多4個少年[6][7]。7月10號，事發第18日，第三波救援行動救埋剩低5個，噉就全部救返晒[8]。

被困人員

編輯

總共13人困喺山窿。其中12人係少年足球隊「野豬隊」（泰文：ทีมหมูป่าอะคาเดมี）隊員，年齡介乎11至16歲，仲有1人係25歲嘅教練查塔汪（Ekapol Chanthawong）。

傷亡

編輯

被困嘅13人最後全部成功救出[9]。但意外造成1名救援人員死亡。

潛水員 Saman Kunan 係泰國海豹部隊退役隊員。7月5號佢送氧氣樽入山窿，返轉頭嗰時，半路冇晒氧氣而犧牲。佢嘅死促使泰國軍方重新研究救援方案，避免再有人出事。[10][11]

救援

編輯

除咗泰國自己，美國軍方、英國、澳洲、老撾、緬甸、中國都有派人到現場協助救援[12][13]。

失蹤階段

編輯
  • 6月23號，12名足球隊員同教練喺泰緬邊界清萊府 Mae Sai 嘅體育場練波。練完波，去咗附近嘅森林公園玩。隊員為咗畀同伴生日驚喜，計劃去睡美人洞探險。因為計劃喺山窿逗留比較長時間，佢哋食飽飯之後先出發，帶住蛋糕同零食到睡美人洞探險。點不知當日撞正泰國雨季落大雨，班人因暴雨灌入山窿，走去高處避難，就噉困喺山窿[14]。當晚，有球員嘅家長發覺細路冇準時返屋企，報警搵人。之後，森林公園巡邏人員喺山窿入口發現球隊留低嘅11部單車、1部摩托車以及運動背囊。當晚大約10點，家長向警方報13人集體失蹤[15][16]。
  • 6月24號凌晨1點左右，清萊醫院嘅救援隊展開搜救行動。深入山窿探索到4公里左右距離，發現12對涼鞋，估計足球隊全部人走咗入山窿深處，但因為洞內水位上漲而困住。泰國警方缺乏潛水搜救裝備，泰國政府喺24號晚派出海豹部隊支援，並由軍隊接手救援[15]。
  • 6月28號，美國太平洋司令部嘅美軍同救生小組抵達現場。除咗搵第啲山窿入口之外，地面亦增加搜救犬同志願小組協助[15]。
  • 6月29號，泰國首相巴育視察救援現場。現場有大約840名士兵、90名特種部隊成員、4架直升機、掘泥機以及第啲救災設備投入搜救行動。[17]有3名搜救人員受輕傷，因為供應照明同抽水機電力嘅電線漏電[18]。

搵返失蹤人員

編輯
  • 7月2號，失蹤9日後，英國潛水員搵返晒成隊少年足球隊，全部倖存。搜救團隊成員包括[12][19][20]：
    • Richard Stanton，56歲，英國人，隸屬「南部與中部威爾斯洞穴搜救小隊」。
    • John Volanthen，47歲，英國人，隸屬「南部與中部威爾斯洞穴搜救小隊」。
    • Robert Harper，70歲，英國人，50年潛水經驗。
  • 當地人表示，少年足球隊隊員經常喺練波之後入山窿探險、抖涼，對山窿地形有一定瞭解。今次唔好彩撞到暴雨，雨勢又急又大，佢哋被迫走入更深嘅山窿。佢哋平時都會帶零食同食水入窿，山窿入邊亦有經岩石過濾嘅雨水可補充水分[21]。

留守待救

編輯
  • 7月5號，受困第13日。泰國《民族報》報導，救援行動方案分三階段[22]：
    • 第一階段：海軍潛水同搜救專家攜帶食物同救生包進入，陪伴受困足球隊，並對地點進行結構調查。
    • 第二階段：醫師同其他專家進入，提供醫療同相關檢查、協助。
    • 第三階段：提供更多食物，訓練少年潛水，同時不斷抽積水，盡量降低水位。
  • 7月6號，受困第14日。部分受困者體力不佳。醫生發現教練同兩個男仔營養不良而虛脫，但又唔夠膽咁快救佢哋出來，因為佢哋太虛弱[23]。另外，山窿入邊數以百計救援人員做嘢，令氧氣含量驟降，由平時嘅21%跌到15%。救援大隊一方面喺山窿上高嘅森林鑽窿，多啲透氣地方，另一方面鋪設氣管到山窿入邊注入氧氣[23]。泰國海豹部隊退役隊員 Samam Kunan 犧牲。佢幫手將氧氣樽布置出洞嘅路度。Saman Kunan 同拍檔帶住氧氣樽前往足球隊受困地點，返轉頭嘅時候，氧氣唔夠，喺距離洞口1.5公里嘅地方昏迷。拍檔發覺佢暈咗喺水度。試過幫佢做心外壓急救，但唔成功，Saman Kunan 卒之不幸罹難[24]。

救出山窿

編輯
  • 7月8號，受困第16日，第一波救援行動展開，用咗11個鐘，救出4個細路。
    • 救援策略：原本泰國政府認為應該俾壯健嘅𡃁仔走先，但澳洲醫生哈里斯入洞診斷班𡃁仔嘅健康狀況後，認為孱弱嘅𡃁仔唔拖得，建議俾最孱嘅走先，如果唔係，繼續留喺山窿恐怕會喪命。最後官員採納意見，先救孱仔[25]。
    • 救援方式：喺需要潛水嘅路段，兩個潛水員前後包夾，護送受困𡃁仔。行前嘅潛水員背住前進方向來行，噉就能夠望住𡃁仔，並負責揹𡃁仔用嘅氧氣樽。另一個潛水員殿後。另外，為咗𡃁仔情緒安定，事先畀鎮定劑佢哋食[26]。
    • 救援時機：泰國軍方決定喺呢日發動救援，因為依據天氣預報，之後會有三四日豪雨，山窿恐怕因為雨水又浸住，錯失最佳時機。而且，當日山窿水位有下降，令部分路段好行啲[27]。
    • 呢次行動總共有50名外國潛水員、40名泰國潛水員參與。[28][29]
  • 7月9號，受困第17日，第二波救援團隊，使咗9個鐘，再救出4個𡃁仔[6][30]。
  • 7月10號，受困第18日，第三波救援行動，淨係用咗7個鐘就救埋剩低4個𡃁仔同個教練[8][31]。

甩難之後

編輯

頭兩日先救出嘅8個𡃁仔，冇人發燒。佢哋一出山窿即刻戴太陽眼鏡保護對眼，因為佢哋逗留喺黑鼆鼆嘅環境十幾日，對眼無法承受出面日頭嘅強光。幾個𡃁仔體溫偏低。有一個𡃁仔送醫嗰陣心跳頻率偏低。

所有人離洞後，立即送到醫院隔離7日。因為佢哋長期留喺山窿，洞中環境濕冷、昏暗、唔通風，期間亦冇乜點進食，因此必須觀察佢哋有冇感染洞穴相關嘅疾病，譬如有冇俾寄生喺蝙蝠排泄物嘅菌類感染，以及觀察皮膚擦傷同割傷嘅復原狀況。另外，有兩個𡃁仔肺部疑似出現感染症狀，醫院已同佢哋打咗抗生素[32]。

家陣有部分人可以同親屬會面，但為咗確保佢哋唔會傳染疾病，佢哋只能夠隔住玻璃見人。或者，親屬必須著防護衣，距離必須相隔兩米[33]。

救援困難

編輯

水位升高同埋潛水能見度降低

編輯

泰國正值雨季，連日暴雨令山窿水位持續升高，每個鐘可以上升15公分，有啲地方積水深達5米。洞內泥水污濁，增加潛水員救援難度。即使泰國政府調來大型水泵同水管抽水，但水管經常俾泥石樹葉之類嘅雜物堵塞，抽水速度又唔夠落雨水浸快。[18][34]

鄰近農民受抽水影響，抽出來嘅污水排落農田，導致過百位農夫嘅農田同作物謝雞，影響範圍遍及2.2平方公里嘅稻田。[35]

洞穴地形複雜

編輯

睡美人洞全長十幾公里，係泰國第4長洞穴，全世界最難導航嘅洞穴之一。通道崎嶇狹窄，至今都未有人能夠行晒全程。[35]面對複雜嘅洞穴地形，英國潛水專家指出，「呢個窿嘅構造唔係太複雜，但係好長，通道大細不一，落雨增加救援難度。」[18]

潛水脫困難度高

編輯

雖然足球隊受困地點距離山窿入口僅4公里，但係落大雨造成水浸，並非每一橛都行到人，其中2.5公里需要潛水或游水，有啲地方水深十幾米。要行晒成條路，專業潛水員單程都要6個鐘（往返11至12個鐘），更何況唔識水性、啱啱開始學潛水嘅𡃁仔。加上足球隊喺窿入邊困咗幾日，體力不佳，或心理承受能力有限，所以長時間潛水係好大挑戰。如果初學者喺潛水過程一時驚慌或失誤，恐怕會釀成悲劇，連累救援人員。[36][37][38] [39]

冇第條路走

編輯

救援隊試過喺山窿上高掘地道，希望能夠製造一條直通受困地點嘅逃生路線，不過呢個計劃評估唔掂，因為掘窿速度太慢，起好新路線需要時間，仲要大型機械來鑽開岩石。挖之前又必須先調查確認方位，先能夠準確鑽窿。鑽窿過程亦會有崩塌風險。[39][40]

足球隊故事

編輯

佤族少年

編輯

紐約時報報導，其中一位足球隊員係14歲嘅佤族少年阿杜（Adul Sam-on），喺泰緬邊境出世。佢父母喺佢6歲嗰時將佢送到泰國，希望佢能受到較好嘅教育，脫離家族貧困唔識字嘅遭遇。阿杜同教練查塔汪一樣，係受困者當中3個無國籍少數族裔之一，冇法子攞到任何國家嘅公民身份。阿杜嘅父母8年前將佢送到泰國之後，央求美塞縣一對浸信會牧師夫婦照顧阿杜。阿杜同好多無國籍細路一樣，積極向學。佢識5種語言，泰文、緬甸文、中文、英文同佤族語，喺學校學業同運動成績俱佳，享有免學費同免午餐費嘅待遇。呢一次被困山窿，就係佢好有禮貌噉同最早搵到受困者嘅英國潛水員溝通，說明受困者最需要食物。[41][42]

教練引起爭議

編輯

「野豬隊」受困消息傳開，興起追究相關人士嘅討論。足球隊員全部都係未成年人，而教練查塔汪（Ekapol Chanthawong）作為成年人，居然帶一大班未成年人喺雨季進入山窿探險，行為輕率，因此耗費龐大社會資源。泰國警方拒絕評論社會傳言，淨係表示會審視本案。[43]

不過，有泰國媒體同網友指出，當時係足球隊員獨自先入山窿探險失蹤，教練喺家長請託底下入洞尋人，點知一齊被困。因此教練對於少年受困並冇責任，反而多得佢，班𡃁仔先至有命。被困期間，教練有安撫少年情緒，教導少年正確嘅求生知識（譬如打坐躺臥減少能量消耗、禁飲污糟水、採集洞內滲透清水），仲分自己嘢食畀學生，噉先成班捱到救援大隊來到。[44][45]

睇埋

編輯

攷

編輯
  1. ↑ Live : เจอแล้ว! 13 ชีวิตหมูป่าติดถ้ำหลวงเชียงราย #ถ้ำหลวงล่าสุด #ทีมหมูป่า #ข่าว13ชีวิต, 2018-07-02, 原先內容歸檔喺2018-07-05, 喺2018-07-05搵到
  2. ↑ 〈泰國少年足球隊洞中倖存奇蹟：家人團聚談何容易〉。《BBC News 中文》 (英國英文)。2018-07-03。喺2018-07-11搵到。
  3. ↑ 網易。〈奇迹！泰國13人足球隊被找到 失蹤10日後仍生還〉。news.163.com。原著喺2018-07-05歸檔。喺2018-07-06搵到。
  4. ↑ 〈圖文解釋：四人獲救，泰國洞穴營救仍困難重重〉。《BBC News 中文》 (英國英文)。2018-07-09。喺2018-07-11搵到。
  5. ↑ 郭春曉、付晨晨 (2018-07-08)。〈奇迹！泰少年足球隊員4人被救出！仍有9人等待含教練〉。新京報網。 {{cite news}}: Cite has empty unknown parameter: |dead-url= (help)
  6. ↑ 6.0 6.1 CNN (2018-07-09). "Eight boys have been rescued from the Thai cave". {{cite news}}: Cite has empty unknown parameter: |dead-url= (help)
  7. ↑ 〈【泰少年足球隊受困】第8名少年獲救〉。《東方網 | 馬來西亞東方日報》 (中文)。喺2018-07-11搵到。
  8. ↑ 8.0 8.1 "Thai cave boys rescue ends in success". BBC News (英國英文). 2018-07-10. 喺2018-07-11搵到.
  9. ↑ 〈獲救奇蹟：泰國被困少年「小小年紀居然那麼酷」〉。《BBC News 中文》 (中文)。2018-07-10。喺2018-07-12搵到。 {{cite news}}: Cite has empty unknown parameter: |dead-url= (help)
  10. ↑ 〈泰國溶洞救援：前海軍潛水員喪生後的挑戰與選項〉。《BBC News 中文》 (中文)。2018-07-07。喺2018-07-12搵到。 {{cite news}}: Cite has empty unknown parameter: |dead-url= (help)
  11. ↑ 〈泰國潛水員沙曼：倒在為受困少年運送氧氣的路途中〉。《BBC News 中文》 (中文)。2018-07-08。喺2018-07-12搵到。 {{cite news}}: Cite has empty unknown parameter: |dead-url= (help)
  12. ↑ 12.0 12.1 BBC (2018-07-02). "Thailand cave rescue: Boys found alive after nine days".
  13. ↑ 徐簡 (2018-07-03)。〈泰國少年足球隊洞穴困9天 奇蹟生還〉。大紀元。
  14. ↑ 洪翠蓮 (2018-07-09)。〈英媒曝光4名獲救泰國足球少年 最小的11歲〉。新頭殼。 {{cite news}}: Cite has empty unknown parameter: |dead-url= (help)
  15. ↑ 15.0 15.1 15.2 轉角國際 (2018-06-28)。〈泰國失蹤的洞穴少年團：消失5日，美軍趕赴搜救〉。聯合報。 {{cite news}}: Cite has empty unknown parameter: |dead-url= (help)
  16. ↑ 聯合報國際中心 (2018-07-03)。〈岩洞失蹤9天 泰足球隊13人全生還〉。
  17. ↑ 中央社 (2018-06-30)。〈泰國12足球少年受困洞穴7天 潛水員深入搜救〉。 {{cite news}}: Cite has empty unknown parameter: |dead-url= (help)
  18. ↑ 18.0 18.1 18.2 黃凱熙 (2018-07-01)。〈泰國少年足球隊探險失蹤 美英軍方協助救援〉。大紀元。 {{cite news}}: Cite has empty unknown parameter: |dead-url= (help)
  19. ↑ Oliphant, Roland; Horton, Helena (2018-07-09). "Meet the seven British divers playing leading roles in the Thai cave rescue mission". The Telegraph (英國英文). ISSN 0307-1235. 喺2018-07-11搵到.
  20. ↑ 韓政燕 (2018-07-04)。〈英專家突破山洞 救援大功臣〉。蘋果日報。原著喺2020-03-28歸檔。
  21. ↑ 蘋果日報國際中心 (2018-07-03)。〈泰13師生撐9天關鍵：常進洞探險　熟悉地形〉。原著喺2018-07-07歸檔。 {{cite news}}: Cite has empty unknown parameter: |dead-url= (help)
  22. ↑ 蘋果日報國際中心 (2018-07-05)。〈救援分三階段 盡快抽乾積水〉。原著喺2018-07-07歸檔。
  23. ↑ 23.0 23.1 蘋果日報國際中心 (2018-07-06)。〈泰救援指揮官首度承認無法等　須盡早撤離師生13人〉。原著喺2018-07-17歸檔。
  24. ↑ 蘋果日報國際中心 (2018-07-06)。〈【泰13師生受困】送氣瓶入洞來回12小時　泰前海豹隊員缺氧罹難〉。
  25. ↑ 蘋果日報國際中心 (2018-07-10)。〈泰國洞穴救人英雄成就奇蹟　歷史留名〉。原著喺2018-07-17歸檔。
  26. ↑ 風傳媒國際中心 (2018-07-10)。〈泰國洞穴救援行動圓滿落幕！足球隊員、教練共13人全數救出〉。
  27. ↑ 桂家齊 (2018-07-08)。〈為何選今天營救？　泰官員：再不救就錯失最佳時機〉。蘋果日報。原著喺2020-03-28歸檔。
  28. ↑ 桂家齊 (2018-07-08)。〈【不斷更新】泰洞穴救援已救4人　下波行動再等10小時(動畫)〉。蘋果日報。
  29. ↑ Mattha Busby, Kate Lyons (2018-07-08). "Thailand cave rescue: navy Seals confirm four boys have been rescued – live". The Guardain.
  30. ↑ Euan McKirdy, Steve George & Judith Vonberg (2018-07-09). "Thai cave rescue suspended for the day after four more boys freed". CNN.
  31. ↑ BBC (2018-07-10). "BREAKING: Thai Navy Seal team: 12 boys and their coach are out".
  32. ↑ Michelle Roberts (2018-07-10). "Cave rescue: Final push under way in Thailand---In quarantine". BBC.
  33. ↑ BBC (2018-07-10). "Cave rescue: Eight rescued Thai boys in 'good health'".
  34. ↑ 曹國維 (2018-07-03)。〈困在迷魂洞9天的泰國少年們找到了 13人都活著〉。聯合報。
  35. ↑ 35.0 35.1 蘋果日報國際中心 (2018-07-03)。〈【不斷更新】泰師生水困10天　首見搜救員對話曝光：今星期幾〉。原著喺2018-07-17歸檔。
  36. ↑ 蘋果日報國際中心 (2018-07-06)。〈【動畫詳解】地形險峻、水勢難料　泰13師生救援難度超高〉。原著喺2020-03-28歸檔。
  37. ↑ 錢玉紘 (2018-07-07)。〈氧氣剩15%！足球隊13人「已能走路」 估採潛水救援要花11hr〉。東森新聞。
  38. ↑ 桂家齊 (2018-07-04)。〈泰受困山洞少年最新影片曝光　開始學潛水〉。原著喺2020-03-28歸檔。
  39. ↑ 39.0 39.1 蘋果日報國際中心 (2018-07-04)。〈【奇蹟片】泰13師生困穴9天　奇蹟活命〉。原著喺2020-03-28歸檔。
  40. ↑ 吳巧曦 (2018-07-07)。〈鑽洞潛水各有難處 專家：可先等待〉。原著喺2018-07-17歸檔。
  41. ↑ "Stateless and Poor, Some Boys in Thai Cave Had Already Beaten Long Odds" (英文). 喺2018-07-12搵到.
  42. ↑ 〈令人動容的教養：一個泰國受困少年如何會說五種語言 | 泰洞穴搜救奇蹟 | 全球 | 聯合新聞網〉。《聯合新聞網》。喺2018-07-12搵到。 {{cite news}}: Cite has empty unknown parameter: |dead-url= (help)
  43. ↑ 施旖婕 (2018-07-05)。〈雨季帶隊探險13人受困山洞　泰教練恐遭起訴〉。蘋果日報。原著喺2020-03-28歸檔。
  44. ↑ 張中宜 (2018-07-09)。〈1口食物未吃！教練用「獨門保命法」　帶少年們撐過9天〉。TVBS News。
  45. ↑ 廖綉玉 (2018-07-05)。〈受屁孩連累、被媒體誤會的第13位受困者？少年足球隊教練並非探險帶隊者，而是受託救出隊員的最大功臣！〉。風傳媒。

出面網頁

編輯
 
維基同享有多媒體嘅嘢：
2018 Tham Luang cave rescue
由「https://zh-yue.wikipedia.org/w/index.php?title=泰國少年困山窿意外&oldid=2106022」收