流動叉電器
(由流動充電器跳轉過嚟)
流動叉電器（粵拼：lau4 dung6 caa1 din6 hei3，又叫流動充電器、流動電源、移動電源，中國大陸俗稱充電寶，喺香港又俗稱尿袋、隨叉、隨差，喺澳門稱為奶媽，臺灣叫行動電源、行動充，英文：power bank），係隻可以隨身袋住隨時幫電子設備叉電嘅產品。大多數流動叉電器用USB線來幫其它電子設備叉電，之後可以用USB線連落插蘇道來叉返電入去。
組成
編輯除咗外殼同接口（有USB、Micro USB等幾種）之外，一般流動叉電器重會有
- 可充電池，用來儲電，係流動叉電器嘅核心組件。電池品種有鎳氫/鎳鎘電池、液態鋰離子電池（經常就噉簡稱鋰離子電池，包括磷酸鐵鋰電池[註 1]）、鋰離子聚合物電池（簡稱鋰聚電池，即固態鋰離子電池）等品種，其中鎳氫/鎳鎘電池近年來逐漸被後兩種淘汰。圓柱形嘅液態鋰離子電池經常被人按照出廠型號簡稱做18650，爾個型號係反映電池嘅大細，即係高65mm，直徑18mm，但係18650電池入面嘅電極材料可以有好多種。鋰離子電池亦可以係方嘅。不過總體來講，液態鋰離子電池嘅外形無太多選擇，亦無辦法做到好細嚿。而鋰聚電池就可以，而且鋰聚電池無漏液嘅風險[註 2]。
- 指示器，用來話畀用戶知電池入面重有幾多電，係叉緊電定係放緊電之類，有LED燈、數碼管同液晶屏等品種[1][2]。
- 電路板，好多嘢都係靠佢，比如話變壓同穩壓、過載保護、過放/過充保護，同埋令指示器正常工作等等。
新浪科技就將流動叉電器分成三個模塊：電池、電路板同外殼[1]。
主要指標
編輯一般嘅流動叉電器都會喺包裝上面明確標示佢嘅一系列指標，包括：
另外，經常提到影響流動叉電器好壞嘅一個指標係轉換效率，即係標示嘅電量有幾多可以真係從流動叉電器流出來（被充電嘅設備本身亦有轉換效率嘅問題，總嘅轉換效率要兩樣夾埋來睇）。流動叉電器轉換效率去唔到百分百，主要受制於兩樣嘢，第一樣係升壓電路造成嘅電量損失，所有鋰離子電池（無論液態定固態）平均輸出電壓都唔超過3.7伏[註 3]，而流動叉電器輸出電壓一般係5伏，用能量守恆原理可以計到升高電壓會令電量最多得返原來嘅74%[3]，爾部分效率由電池本身決定。第二樣係電路板同指示器嘅能耗等等造成嘅各種內部損耗，爾樣嘢由流動叉電器生產工藝決定。
而決定流動叉電器係勿安全嘅重要指標就係過載、過充/過放、過熱、漏電等等爾啲保護係勿做得好。
註
編輯參考
編輯- ↑ 1.0 1.1 〈數碼幫第六期：移動電源那些可以說的秘密〉。《新浪網》。原著喺2015-03-17歸檔。喺2015-05-21搵到。（簡體中文）
- ↑ 驅動中國網 （北京） (2014-06-19)。〈用戶基本知識掃盲:移動電源應該看什麼？〉。《網易》。原著喺2016-03-05歸檔。喺2015-05-21搵到。（簡體中文）
- ↑ 天極網 (2012-11-21)。〈揭示真相：移動電源轉換效率解析(圖)〉。《新華網》。喺2015-05-21搵到。（簡體中文）
- 爾篇文部分內容由中文維基百科文章行動電源（版本35101134）攞料，並以創意共享之下，署名兼共享版權嘅3.0版本協議授權使用。原文作者請睇嗰版歷史。
- 爾篇文部分內容由英文維基百科文章Lithium-ion battery（版本663216067）攞料，並以創意共享之下，署名兼共享版權嘅3.0版本協議授權使用。原文作者請睇嗰版歷史。