流水落花
《流水落花》（英文：Lost Love）係一套以寄養家庭為主題嘅電影，係香港「首部劇情電影計劃」第六屆專業組嘅得獎作品，獲得香港電影發展局電影發展基金同創意香港資助。電影由賈勝楓執導，羅金翡編劇，鄭秀文、陸駿光、談善言主演，喺2022年11月13號第19屆香港亞洲電影節首度公映，係電影節閉幕電影之一。會喺2023年3月2號正式上映。
| 流水落花 Lost Love | |
|---|---|
| 資料明細 | |
| 導演 | 賈勝楓 |
| 監製 | 李嘉慧 |
| 編劇 | 羅金翡 賈勝楓 |
| 主演 | |
| 製片商 | 流水落花製作有限公司 香港電影發展局 創意香港 |
| 片長 | 92分鐘 |
| 產地 |  香港 |
| 上畫同發行 | |
| 上畫日期 | 2023年3月2號（香港、澳門） |
| 發行商 | 環球影業（香港） 寰亞電影（國際） |
| 預算 | 800萬港元（由香港電影發展局「首部劇情電影計劃」撥款資助） |
劇情簡介 編輯
陳天美（鄭秀文 飾）同何彬（陸駿光 飾）透過莫姑娘（談善言 飾）申請成為寄養家庭，佢哋兩公婆好用心照顧嚟自遇到各種家庭問題嘅細路，有因為媽媽毒癮而缺乏照顧嘅、有父母離異而當成人球嘅、有患有兔唇被嫌棄嘅、有苦苦等待一個家嘅、有對成年人失去信任嘅姊弟、有就快將升上大學嘅。
天美喺細路身上睇到父母、同學、社會造成嘅傷痕，佢用盡方法令各人重拾希望，成為大家依靠、好好相處嘅家人。其他人都讚天美偉大，但佢知道，係呢班細路拯救咗佢。因為一直無法磨滅喪子傷痛嘅天美，直到遇上寄養細路之後，佢早已掏空咗嘅心先至有所寄託，重拾做媽媽嘅感覺；本來有缺陷嘅家庭，亦暫時得到填補。父母養育細路，其實好多時候，係細路拯救咗父母。十三年間，天美醉心於照顧細路，永遠都一意孤行。何彬有外遇，終於令佢聽見埋藏喺對方內心嘅說話，當時天美先至意識到自己忽略對方嘅感受，忽略咗細路真正需要。往後嘅日子，就算何彬努力補救，天美仍然遲遲未能確定自己心意。最終靠住寄養細路有意無意嘅啟發，先至幫助佢哋挽回呢段關係。
演員表 編輯
| 演員 | 角色 | 簡介 |
| 鄭秀文 | 陳天美 | 寄養家庭媽媽，何彬老婆 |
| 陸駿光 | 何彬 | 寄養家庭爸爸，陳天美老公 |
| 談善言 | 莫姑娘 | 社工 |
| 黃梓樂 | 文森 | 因為媽媽染有毒癮而缺乏照顧嘅男仔 |
| 李昀蔚 | 小菁 | 因為父母離異而被當人球嘅女仔 |
| 吳祉嶠 | 小花 | 患有兔唇嘅女仔 |
| 趙啓嵐 | 阿明 | 渴望有一個家嘅男仔 |
| 曾睿彤 | 家希 | 對成年人失去信任嘅少女，家朗家姐 |
| 徐嘉謙 | 家朗 | 對成年人失去信任嘅少年，家希細佬 |
| 劉朝健 | 仲恆 | 即將升讀大學嘅寄養家庭少年 |
| 黃梓軒 | 志滔 | 天美何彬個仔，3歲時因心臟病離世 |
| 谷祖琳 | 校巴司機 | |
| 黃慧君 | 士多老闆娘 | |
| 杜卡妮 | 內地細路 |
電影歌曲 編輯
| 曲別 | 歌名 | 作曲 | 作詞 | 編曲 | 監製 | 演唱者 |
|---|---|---|---|---|---|---|
| 主題曲 | 我這樣活了一天 | 永夏 | 林若寧 | 江逸天 | 江逸天/蔡德才@人山人海 | 鄭秀文 |
出面網頁 編輯
- 流水落花嘅facebook頁
- 流水落花嘅Instagram頁
- 《流水落花》喺豆瓣嘅資料（大陸簡體）
- 《流水落花》喺互聯網電影資料庫嘅資料（英文）
