漢字部件

漢字部件（粵拼：hon3 zi6 bou6 gin2）係漢字嘅組成部分。佢哋可以通過唔同方式組合形成漢字。漢字部件有可能可以再拆。如果一個部件無辦法再拆成更細而仍然有意義嘅部分，就叫做基礎部件。同時係漢字嘅部件叫做成字部件。如果一個部件係基礎部件同時又係成字部件，佢就係獨體字。

漢字部件同部首有聯繫，但又唔同。一個漢字可以由多個部件組成，但係衹會有一個確定嘅部首。

喺動態組字軟件裡面，漢字用漢字部件同「結構」來描述。有唔少字形輸入法都係通過將漢字按照一定規則拆成漢字部件之後對各部件分別編碼，例如五筆字形輸入法同埋倉頡輸入法。

有啲軟件同網站提供用漢字部件查字嘅功能。萬國碼裡面亦有用來同漢字部件一齊用，用來描述漢字結構嘅字符。佢哋喺 U+2FF0 到 U+2FFB 道。