澳洲式幽默

澳洲式幽默（Australian Humour，或者叫做澳式幽默）係指一啲澳洲人之間嘅幽默同埋笑話，澳洲式幽默不時會視之為化解尷尬嘅一個手段，一般人會認為澳洲式幽默會帶有啲自嘲或者諷刺，中國人民大學澳大利亞研究中心主任張勇先喺接受澳洲 SBS 訪問嘅時候就形容，澳洲式幽默係期待你有所回應嘅互動式幽默。

澳洲式幽默嘅表現

澳洲式幽默喺澳洲孕育咗一啲趣怪活動，例如

• 昆士蘭內陸地區文化嘅 Boulia 駱駝賽：一個會鬥快跑去喺駱駝同羊上面貼上標籤，跑返去起點，然後又跑去搣返個標籤嘅比賽。
• 愛麗斯泉（Alice Springs）嘅托德河行舟賽（Henley-on-Todd Regatta）：係一個喺乾涸河床上舉行嘅比賽。

另外，有一啲澳洲嘅公眾人物，都會偶然表現自己幽默嘅一面，有部分媒體就會視之為澳洲式幽默。

• 2012年12月，當時嘅澳洲總理茱莉亞·基勒就曾經同廣播電台 Triple J 一個節目聯手，攞瑪雅人預言嘅世界末日嚟惡搞開玩笑，又話無論發生乜嘢事，佢都會為澳洲人而戰鬥到最後。
• 澳洲前總理譚保（Malcolm Bligh Turnbull），喺2017年7月出席一個由記者團舉辦嘅舞會時，就喺台上致詞嘅時候模仿美國總統當奴侵嘅招牌語氣同埋誇張手勢，令到全場哈哈大笑。但係模仿影片外流之後，為咗避免交糾紛，譚保即刻上節目解釋，化解誤會。

外來文化同埋澳洲式幽默嘅關係

有啲以澳洲留學生為服務對象嘅媒體同組織，都話擁有幽默感，喺澳洲生活非常重要。不過，喺2018年12月，澳洲SBS就報導一個調查，發現有一半嘅澳洲華人新移民覺得自己唔理解澳洲式幽默。