澳門美高梅

澳門美高梅（英文／葡文：MGM Macau）係間起喺澳門半島嘅五星豪華級綜合度假酒店，客房數目為585；間賭場名為澳門美高梅娛樂場（英文／葡文：Casino MGM Macau）。嗰座建築物之內重有天幕廣場、藝術品展示空間、水療中心、餐廳及酒吧7間同埋會議及場地設施。呢檔嘢响2007年12月18號開幕，原本叫做澳門美高梅金殿（英文：MGM Grand Macau），到咗2010年個名改成家陣嗰個。

大堂

爭議

以機器故障為由拒派彩991萬

《東方日報》响2014年6月19號報道：
澳門人葉聚平响2014年4月22號，喺澳門美高梅娛樂場拉老虎機時，畫面顯示中咗彩金幾乎有991萬港幣嘅「巨獎」，然而螢幕有個圖案跟住「反彈」而𠽤住咗。佢攞唔到獎，因而先後向賭場職員同博彩監察協調局要求派彩，都得到噉係機器故障而唔算數嘅回應，後嚟揾到立法議員高天賜幫手繼續追討。美高梅曾經提出派上述金額一成畀佢嚟了事，不過葉先生覺得離譜——連本都收唔返，並冇接受。响同月18號，葉先生亦喺威尼斯人娛樂場遇到同類問題，涉事彩金有1278萬零港幣；佢喺兩處嘅落注加埋大約係四百萬。

响2014年6月19號，葉先生同高天賜，重有另外一個立法議員梁榮仔，一齊去行政長官辦公室就此事遞請願信。

响2014年7月15號嘅立法會全體大會當中，高天賜為此事以及近期其他眾多類似糾紛，提出口頭質詢。博彩監察協調局局長雪萬龍答話唔派彩係啱嘅。立法議員區錦新亦有就此批評。在場旁聽嘅葉先生對呢個回應好唔滿意，認為係偏𥘵賭場，聲言唔會放棄申訴，將會委託高天賜向經濟財政司司長譚伯源繼續追討。

响2014年7月22號，葉先生由高天賜陪同，去到行政長官候選人崔世安嘅競選辦公室，交信求助。

兑錯籌碼引起800萬派彩爭詏

濠博新聞响2022年3月18號報道：
該傳媒收到消息，得知有個大陸人，响上個月於澳門美高梅娛樂場入面嘅幸運六賭檯玩時，交出面值港幣一萬嘅籌碼畀荷官唱散，由於失誤，收返嚟嘅係十個各值港幣十萬嘅籌碼；佢跟住用其中嘅四個落注兼贏咗，得到有成港幣八百萬嘅派彩……後來賭場發現出咗錯，再為此花咗好多時間去同個對方講數。記者用衣貓向美高梅詢問件事堅唔堅，以及詳情為何，收唔到回覆。

以機器故障為由拒派彩43萬

《蘋果日報》响2010年6月5號報道：
响噚日，香港人蔡先生喺澳門美高梅金殿嘅賭場玩電子老虎機，到咗晏晝12點半鐘左右，由顯示屏可見中咗「jackpot」，獎金為港幣$426,300，然而畫面定住咗，佢攞唔到獎，於是求助。職員擝走佢張遊戲咭，插入職員咭，然後用鎖匙開鎖再上鎖，整兩整，部機即刻變咗顯示佢只係有1,500積分（換算成真錢微不足道），可謂見財化水。賭場堅稱噉係機器故障，唔肯派彩，蔡先生唯有向博彩監察協調局投訴。

《蘋果日報》响2010年6月15號報道：
局方响噚日同蔡先生開會。後者指，期間對方主要問佢上述事發經過如何，並冇講預計幾時會調查完，又提及賭場所交嘅報告內容失實。

其他

响2020年11月1號大約中午12點50分，酒店職員發現有個男住客死咕咕兼光禿禿噉樣攤喺地上面，重要有傷見血，於是報警；佢之後當場被證實冇得救，係個35歲姓袁嘅大陸人；呢個人似乎死於自殺。