打茄輪
(由濕吻跳轉過嚟)
打茄輪（又叫濕吻、打車輪），係一種浪漫而性感嘅咀嘴方法。係將條脷伸入對方口入面，互相掂到對方條脷。打茄輪會掂到對方個嘴唇、脷同口，呢啲部份相當敏感，所以會帶嚟性刺激。世界上有好多地方嘅社會風俗唔鼓勵人哋喺公開場合打茄輪，甚至將佢當係避忌。亦有啲傳染病係會透過打茄輪嚟傳染[1]。
相傳喺古代，一啲男人會將一啲酒放喺屋企，有啲老婆會趁老公去咗返工，然後偷老公啲酒嚟飲。老公為咗知道老婆有冇偷飲酒，老公放工返屋企就會將條脷放入老婆個口入邊，睇下有冇酒味。於是乎嘴唇貼嘴唇，再將條脷伸入對方口中就變成咗浪漫嘅行為，因為呢個係老公同老婆之間先會做嘅嘢。
「茄輪」本身係一個英文字cannon，cannon有碰撞嘅意思，用喺呢度可以表示嘴唇同嘴唇之間嘅碰撞。而「打」呢個字喺廣東話入面有「進行中」嘅意思，例如「打甂爐」，就係一路煮，一路食，所以呢度嘅「打」都有咁嘅意思。至於個「輪」字就有交互輪轉嘅意思，呢度指兩條脷互相轉嚟轉去。