瀦龍河

瀦龍河（瀦讀豬，粵拼：zyu1 lung4 ho4），又寫豬龍河，係位於中國河北嘅河，屬大清河水系，係南支大清河最大嘅行洪河道，大體位於保定轄地內。瀦龍河係由三條河合流形成，主流係大沙河（沙河），喺安國一帶同磁河、小清河（孟良河）合流後就叫瀦龍河，合流位置喺安平北郭村上游，其中最後滙入嘅磁河河口喺安國軍詵村北面。之後向東北流，流過安平北部、博野、蠡縣、高陽，最後喺劉李莊滙入白洋澱中嘅馬棚澱（又有講法喺東白莊、郝家莊入澱，因爲條河改過多次河道）。當中從北郭村到白洋澱嘅河道長80.5公里，流域面積8600平方公里，條河闊800~1800米。

瀦龍河
豬龍河、蟾河、楊村河、高陽河、布里河
河
國	中國
省/州/邦	河北省
	保定市、衡水市
區	安國市、安平縣、博野縣、蠡縣、高陽縣、安新縣
屬於	大清河
源頭	磁河河口
- 位置	中國保定安國
- 座標	38°19′12.8″N 115°21′39.1″E
河口	白洋澱
- 位置	中國保定安新
- 座標	38°49′20.5″N 115°53′48.2″E
長度	80.5千米（50哩，161里）
闊度	1.8千米（1哩，4里）
流域面積	8,600 km²（3,320 mi²）
長度、闊度、流域面積數據出自。其中闊度取最大値。河源、河口等地理信息可查。

根據記載，歷史上瀦龍河原本係磁河（滋河）、大沙河、唐河合流而成，但喺清嘉慶六年（1801年），唐河發洪災，改咗河道，從定州向北遷移，經望都、清苑、安新，自己入白洋澱，而孟良河攞走唐河嘅舊河道，變成而家三河合流嘅局面。喺更早時期，呢帶水系有好唔同嘅面貌，《山海經》時代呢度係古黃河嘅水脈，戰國中期先脫離黃河，形成獨自水系；之後相當長時間，磁河（滋水）、大沙河（泒水）係屬滹沱河水系，到宋代開始磁河脫離滹沱河，元代以後唐、沙、磁三河合流局面成型，就有咗現時嘅面貌，因爲元明之後當地水土流失嚴重，條河多次決堤、改道，根據改咗嘅河道，安過好多名。

名

瀦龍河嘅名有段古，根據明清地方志同民間傳說，話喺上古顓頊時，有豬化爲龍，條龍變成呢條河，所以就叫豬龍河，後來寫成瀦龍河。瀦龍河舊河道之上嘅龍化就係根據呢個傳說而得名。

有種講法話，「豬化龍」其實係「瀦化瀧」，意思係「平靜嘅澤水變爲水勢急嘅河流」。但根據《康熙字典》，「瀧」解「急流」係「南人名湍曰瀧」，換言之呢個係南方話，而瀦瀧河流域係華北地區；清代《畿輔通志》當中係寫「豬龍河」，冇三點水嘅，而且重畀咗另一解，話「豬龍」係轉化自「伏龍」，所以呢種講法可能唔係好可靠。

有觀點認爲，瀦龍河流過嘅高陽就係顓頊高陽氏嘅地望，而瀦龍河係顓頊出世地。根據史料，話顓頊嘅母系係蜀山氏，而佢喺若水出世，部份史家認爲噉表明顓頊喺四川雅礱江出世。根據呢個睇法嘅攷據，蜀山氏唔係話佢喺四川（蜀），而係通假，通做「涿」，蜀山即涿鹿山，喺河北；而古代若同桑係同一字，若水即係桑水，桑水即係瀦龍河上游地帶，所以顓頊有可能就出世喺而家瀦龍河流域。

瀦龍河有多個名。喺博野又叫蟾河（sim4 ho4），喺蠡縣又叫楊村河（joeng4 cyun1 ho4），喺高陽又叫高陽河（gou1 joeng4 ho4），因爲順治年間曾經喺布里村決口，所以又叫布里河（bou3 lei5 ho4）。

水利

大清河嘅水系分南北兩支，其中滙入白洋澱嘅都係南支，而瀦龍河係南支當中最大嘅行洪河道。瀦龍河兩邊嘅河堤都要防洪，其中右堤叫做千里堤，長189公里，係河北四條一級堤防之一，呢條河堤好緊要，係用來保住冀中平原免受洪災嘅屏障。佢嘅左堤次要啲，係三級堤防。

瀦龍河比較多沙，又係季節性河流，所以佢嘅河床淤積幾嚴重，有比較大嘅防洪壓力。所以1957年喺左岸嘅陳村起咗固定嘅分洪口，整咗條28公里長、1500米闊嘅陳村分洪道，以左堤爲主堤，設計流量1500 m³/s，不過過咗咁多年嘅淤積，過水能力同瀦龍河一樣低過從前。爲咗保住千里堤，按照洪水調度，當陳村水位超過19.1米兼持續上漲時，啟用陳村分洪道排洪；若果繼續漲，就喺仉村臨時分洪；若果繼續漲到19.7米，就會喺陳村以上、瀦龍河左堤嘅董莊、呈各莊附近分洪；如果噉都緩解唔到汛情，就會另揀其他地方開口分洪。

除咗防洪，又有其他水利工程。瀦龍河本身有青穿瀦幹渠穿過，可以引水灌溉；佢上游嘅河源亦有啲水庫，其中磁河上游有橫山嶺水庫，位於靈壽岔頭馮溝村附近；大沙河上游有王快水庫，位於曲陽鄭家莊西面；大沙河嘅支流郜河有口頭水庫，位於行唐口頭。呢三個水庫都用來防洪、灌溉、發電用。