螢幕閱讀器

螢幕閱讀器（英文：screen reader），又叫讀屏軟件，係一種專為盲人設計嘅軟件，屬於無障礙輔助科技，目的係幫用家喺睇唔到螢幕上面嘅嘢嘅情形之下，都可以知道螢幕上面寫咗乜嘢字。喺電腦，螢幕閱讀器嘅輸入通常係鍵盤，喺手機就通常係喺手機螢幕上面做嘅手勢；輸出就通常係配合少量聲效嘅合成語音，但係亦都可以駁點字顯示器顯示凸字。用家主要亦都係盲人。

雖然呢種嘢個名叫做螢幕閱讀器，但係其實只係以前用喺文字用家介面嘅先會真係閱讀個螢幕；而今市面上嘅螢幕閱讀器，其實係透過視窗系統嘅無障礙應用程式介面直接攞擺咗喺視窗上面嘅字其他嘅資料，另外，網頁瀏覽器會特別畀多啲資料畀螢幕閱讀器。

螢幕閱讀器嘅運作影響咗乜嘢叫做好嘅網頁，好多數碼領域嘅無障礙指引都同螢幕閱讀器嘅運作有關。

根據2019年 WebAIM 機構做嘅調查，最多人用嘅螢幕閱讀器係 NVDA，順序跟住係 JAWS、VoiceOver 同 Narrator。