中暑

中暑（英文：Heat stroke）係人喺酷熱嘅環境之下體溫上升，身體機能就會自動調節嚟降溫，例如增加排汗同呼吸次數。但係當環境溫度過高，呢啲生理調節唔能夠有效控制體溫嘅時候，就會出現熱衰竭甚至中暑等情況。徵狀包括頭暈、頭痛、反胃、氣促、神志不清等。當體溫升至攝氏41度或以上嘅時候，更會出現全身痙攣或昏迷等現象，若果唔及時幫患者降溫同急救，就會有生命危險。

中暑嘅成因

• 暴露喺高溫環境中運動或工作
• 穿着過多衣服，汗水未能夠蒸發
• 冇飲足夠嘅水補充出汗流失嘅水分
• 飲酒影響身體調節體溫嘅能力

其他風險因素：

• 5歲以下嘅幼童或65歲以上長者
• 肥胖、患心臟病或高血壓等
• 缺乏冷氣或風扇
• 受到某啲藥物影響

預防措施

• 穿着淺色同通爽嘅衣物，以減少身體吸熱，並方便排汗同散熱。
• 帶備並補充足夠嘅水，以防脫水。
• 保持充足睡眠。
• 工作同休息間取得適當平衡。
• 避免飲用含有咖啡因（例如：茶或咖啡）或酒精嘅飲品，因為呢啲飲品會加速身體水分透過泌尿系統流失。
• 避免進行劇烈運動或作長程嘅登山或遠足等活動，因為高溫、出汗、疲勞都會額外消耗體力。
• 喺室內活動嘅時候，應盡量打開窗門或開啟風扇或冷氣保持室內通爽涼快，避免喺潮濕悶熱嘅環境之下進行劇烈運動。
• 進行活動嘅時候若果感到唔舒服，應該立刻停止，並盡快求醫。

處理患者

應該：

• 保持冷靜，打電話叫救護車
• 將患者帶到陰涼地方
• 用濕毛巾幫佢抹身降溫
• 畀水佢飲水，補充水分

注意事項 :

• 唔好用酒精幫患者抹身降溫
• 喺患者未完全回復清醒嘅時候，唔好畀佢飲食