熱身運動

熱身運動（英文：Warming up）係運動或比賽之前，幫助身體能夠適應劇烈活動嘅準備動作，目的係令到人體逐漸從靜止狀態過渡到運動狀態；能夠令到心跳加速同提升少少體溫，增加全身同肌肉嘅血液循環，令關節更加靈活，提升運動表現同避免受傷，熱身通常只需要五至十分鐘。

運動前熱身

熱身主要分為靜態熱身同動態熱身，靜態熱身以拉筋為主，動態熱身，以慢跑小跳、轉動身體等為主。熱身只要做到身體出少少汗，關節伸展，輕微活動就可以。

要點

• 運動量要由慢到快直至出少少汗為止。
• 唔好太劇烈，以免引致疲勞。
• 熱身運動最好包括輕微身體活動同拉筋。
• 熱身運動亦應該包括將要進行嘅技術動作。
• 熱身運動嘅次序最好係：輕微身體活動 → 拉筋 → 技術動作練習
• 天氣凍嗰陣，熱身運動時間應該加長到廿分鐘。
• 熱身到輕微出汗之前唔應該太快除咗運動外套同長褲，因為會妨礙熱身效果。

熱身運動嘅好處

• 加速心臟嘅收縮，提高搏血量，加速血液循環工作，為肌肉工作做好準備。
• 體溫升高，增加肌肉嘅彈性，防止強烈運動肌肉受傷。
• 令到關節嘅活動增加，增加潤滑液，減少運動時關節嘅摩擦。
• 心理做好準備，開始運動。
• 調節呼吸系統，以適應運動嗰陣身體對氧氣嘅需求。

唔做熱身嘅害處

如果運動之前唔做熱身，會有好多害處，包括以下：

• 肌肉嘅溫度冇增加，血液循環比較差，容易令到肌肉拉傷。
• 肌肉收縮速度同收縮力弱，易抽筋。
• 因為耐黏性降低而增加肌肉效率，令到營養元素供應冇咁好，排除體內廢物冇咁暢順，新陳代謝效率低。
• 中性刺激物嘅快速反應弱，影響鍛煉效果。
• 協調性差。
• 心臟呼吸系統效率減弱，包括強化血紅素中氧氣嘅結合，唔能夠改善有氧新陳代謝；唔能夠增加肺嘅血流量；唔能夠增加組織中嘅氧氣交換，因為血紅素喺溫度較高嘅時候，會提供比較多氧氣。