物累
身外物多而苦攰
物累，人苦一種，身外物太多變成負擔，搞到人攰。又叫物役，人畀外物勞役。物欲太多而累。莊子哲學有提及，天道「故知天樂者、無天怨、無人非、無物累、無鬼責。[1]」知道天樂者，唔受外物所拖累。
物累會招致滿屋物品。古時無自動機器生產，一般人好難有太多物品，天然嘢亦有時限，會腐壞。之不過有錢就會有愛好，累積愛好品，如金石古物之類。大清時篆刻家，好似鄧石如、王福庵都刻過「有好都能累此生」[2]。
唔受物累，睇成賢人修養。歐陽修寫歸田錄，呂蒙正不受鏡個故仔後面評論，「蓋寡好而不為物累者，昔賢之所難也。[3]」
自有工業大量生產，容易造成物累。加上速銷手段，如買幾件有平，買幾多錢有折，唔係咁必要都順便買埋，易搞到人買多咗嘢。唔捨得掉嘢，物累嚴重，就會變成垃圾屋。
收納租倉都唔係辦法，睇唔見物品，會累積更加多。收納完放埋一邊，亦會視而不見。收納要勞力，分類要勞力，取入取出要勞力，會使人更加攰。