特別攻擊隊

特別攻撃隊，簡稱特攻隊，即係指響二戰時期以「同敵人同歸於盡」嘅必死心罷、而進行任務嘅隊伍單位。

呢種作戰隊伍最開頭由日本海軍中將大西瀧治郎提出，目的係為咗響二戰末期應付美國海軍強大嘅優勢、扭轉日軍嘅劣勢，由於日軍響多方面都唔夠美軍打，所以就採取「一人、一機、一彈換一艦」嘅作戰方法，試圖通過自殺式襲撃嚟摧毀美國軍艦，以最少軍力得到最高破壞力。

由於定義同作戰方式多變，又符合日本人嘅武士道精神，加上所付出嘅軍力少，響當時日本被廣泛採納，其中最早成立、最出名嘅一支特攻隊就係「神風特攻隊」，響1944年10月20號成立；另外仲有負責海上作戰嘅「海上特攻隊」、空中作戰嘅「空挺特攻隊」。除此之外，呢種作戰方法亦畀德軍接納，響1945年創立同神風類似嘅Sonderkommando Elbe。