猜包剪揼

 猜包剪揼（粵拼：caai1 baau1 zin2 dap6） 或者叫 猜呈尋（粵拼：caai1 cing4 cam4） 係種零和、訊息不完全、冇「純對策納殊平衡點」嘅遊戲。本身係兩人遊戲，亦可以當成多人遊戲。

包剪揼玩法

喺英文，包即係paper，剪即係scissors，而揼就係rock。

本字

有指「包剪揼」嘅本字係包剪䂿。䂿字個音係達合切，dap6。《正字通》「以腳踏碓舂米曰䂿」，呢句嘢話用腳踩個槌去舂米就叫做䂿。啲人平時講嘅䂿石仔就係呢個䂿。亦可能係包剪𢱕。「猜呈尋」可能係本字猜澄鋹。亦有理論指「呈尋」係「秤沉」變音，而「秤」指「秤砣」。

玩法

基本玩法

玩者先揀出嘅招式，招式有三種：包、剪、揼。包贏揼，揼贏剪，剪贏包，一樣就打和。數一二三、嗌「包剪揼」、「呈尋磨較叉燒包」或者其他口令，講最後一個字嗰時各玩者同時出招。

口令

粵語文化中「包剪揼」遊戲嘅最慣常口令為「呈尋磨較叉燒包，老鼠唔食香口膠，要食豆沙包」。當中每分句配合一個出拳回合，合成「三盤兩勝最公平」。亦有講成「呈尋磨較叉燒包，老鼠唔食豆沙包」嘅兩盤組合。

兩人

兩人一齊出招，如果打和就再猜，直到分出勝負。

多人

多人猜嘅時侯，會有三種情況：

1. 包剪揼都有出，就要再猜。
2. 淨係出得一招（包、剪、或者揼），就要再猜。
3. 淨係出得兩招（包同揼、揼同剪、或者剪同包），包贏揼，揼贏剪，剪贏包。

第一種情況人越多越常見，每次都要重猜，定勝負要用嘅時間就越長。人一多喺嚟，要係噉再猜，所以有人會用「多入小出」先做淘汰。

額外玩法

漢堡包

輸咗嘅人將隻手疊埋，淨返最後一隻手嗰個人（贏家）就會數1、2、3，用隻手拍落去啲手度，輸家就要縮開隻手，唔夠快嘅人就會俾人拍到。

多入小出

• 先用多入小出篩人。原則係包剪揼3組中最少人數嘅兩組先出局，兩組人數相同用兩人對決嘅規則：
  • 例1：三個出包，兩個出剪，一個出揼，出剪同出揼嘅係小出，要走，出包三位再來；
  • 例2：兩個出包，兩個出剪，一個出揼，出揼嘅係小出，出包同出剪嘅人數一樣，剪贏包，出剪兩位再來；
  • 例3：三個出包，三個出剪，三個出揼，無小出，出包剪揼人數一樣，打和，所有人再來。
• 或者，亦有最少人數嘅一組先出局，再猜。
• 或者，猜「包揼多入小出」，即只出包同揼，多嗰邊贏，人數相同嘅時候再猜。（其實相等「河孖」）

彈弓手

出彈弓手即一方等見到對手出招之後變招，係一種茅招。

攷

維基辭典有佢嘅解釋：

搋澄鋹