球童 (足球進場)

  提示：呢篇文講嘅唔係執波仔。

球童（英文：Football child mascots）係足球比賽開始之前陪同足球員進場嘅細路，通常喺6至18歲，男仔女仔都做得，年紀比較細嘅會拖住球員隻手入場，年紀比較大嘅會拉住比賽旗或國旗入場，演奏國歌之後解散。

2012年歐洲國家盃球童

喺1998年法國世界盃開始，國際足協定咗明確規定，為咗令到足球理念深入人心，凡係國際A級足球賽事或者一啲重要嘅足球比賽，必須有球童陪伴入場，不限男女。球童都係比賽主辦方或主隊喺當地足球學校或小學挑選嘅。

目的

手拖住球童首先係因為擴展足球理念，普及足球運動，令到更多細路接觸足球，感受足球，球童嘅誕生令更多人鍾意足球。其次，國際足聯嘅口號係fair play，即係公平競爭，細路天真無邪，童心未泯，唔存在狡猾詭詐，係公平競賽嘅象徵。第三，細路活潑可愛，係和諧同友誼嘅使者，手拖住球童出場，代表住「友誼第一，比賽第二」，更能夠體現和諧溫馨。基於以上原因，足球比賽呢種別開生面嘅入場儀式出現之後，好受歡迎，好快就普及起嚟。