瓜達爾
瓜達爾（Gwadar）係座巴基斯坦西南部嘅海港，近波斯灣霍爾木茲海峽。佢有好大地緣戰略意義，因為接近盛產石油嘅中東、人口多嘅南亞，同埋資源豐富嘅中亞新興經濟區。瓜達爾港預計會帶畀巴基斯坦數以百萬美金嘅外匯[未記出處或冇根據]，至少兩百萬份工[1]。2007年，巴基斯坦政府交咗瓜達爾港口設施嘅廿五年管理權畀新加坡公司，宣布港口做免稅港四十年。中國喺港口嘅建設投入咗大量資金。
交通
編輯1993年，巴基斯坦政府開始研究喺瓜達爾起深水港嘅可行性。港口建設喺2002年3月22號開工，第一階段喺2005年12月完工。港口建設帶動埋其他基建: 包括一條全長700公里，連接卡拉奇嘅高速公路，第日打算會向西拉到伊朗。另外，中巴兩國亦計劃擴建喀拉崑崙公路，由瓜達爾港直通到中國新疆喀什[2]。
巴基斯坦民航局預留咗12平方公里地畀打算起嘅瓜達爾國際機場。
地理
編輯瓜達爾係一個深水港，而且喺巴基斯坦西南部俾路支省，東邊 725 公里係巴國最大港口卡拉奇，西接伊朗邊境，北邊可以直通阿富汗、中亞同中國嘅新疆。由於距離中東石油必經之路霍爾木茲海峽只有400公里，呢塊地方畀巴國政府認為有好大發展潛力同軍事價值。
2006年2月，巴國總統穆沙拉夫訪問中國時提出，話要喺瓜達爾做起點，建設一條通往中國新疆嘅能源走廊（又叫泛喀拉崑崙走廊或泛亞能源走廊），沿走廊修築鐵路同輸油／輸氣管道，將來自中東、伊朗或非洲嘅石油輸送到中國西北部，而瓜達爾就係哩條走廊嘅起點同出海位[3]。
戰略意義
編輯全球百分之四十嘅石油都運經霍爾木茲海峽，而瓜達爾離伊朗得72公里，離霍爾木茲海峽400公里。
2005年，美國能源策略顧問報告《亞洲嘅能源未來》（"Energy Futures in Asia"），就指中國喺南亞同東南亞多國協助起港口，背後有軍事同能源安全嘅考慮，係為突破「馬六甲困局」，達到「三龍出海」（中國突破馬六甲困局嘅三個方案：（一）建立泰國南部沿海至中國西南部嘅"海陸聯運陸橋"；（二）建立"泛亞洲石油大陸橋"，喺中東、中亞同西伯利亞囉石油；（三）喺泰國南部開鑿"克拉地峽運河"）嘅戰略部署，重叫呢種策略做中國嘅「珍珠鏈策略」[4]。瓜達爾同孟加拉嘅吉大港、緬甸嘅實兌港、南沙Woody島，都被當做鏈上嘅珍珠[5]。
巴基斯坦而家最重要嘅深水港卡拉奇太近印度，以前印巴衝突時被印度封鎖過。瓜達爾喺卡拉奇西邊725公里，戰略縱深更大[6]。
港口管理
編輯瓜達爾港口嘅經營權同埋管理權，一度引起中國嘅遠洋企業、阿拉伯聯合酋長國嘅杜拜港口世界公司，以及新加坡港務局等多方角逐[7]。但係中國嘅參與，引起歐美同印度嘅關注，喺2006年2月瓜達爾所屬嘅俾路支省發生針對中國工程人員嘅恐怖襲擊，導致三個中國人死亡，中國公司嘅機會開始被睇淡。
同年10月，杜拜港口世界公司突然宣布退出投標。雖然有猜測指係因為印度國防部門反對，但杜拜港口世界公司否認 [8]。
2006年12月，新加坡港務國際公司為首嘅財團，中標獲瓜達爾港務執行局選中做瓜達爾港營運商[9]。
註
編輯- ↑ ""Gwadar deep seaport to generate two million jobs"". en:Daily Times (Pakistan). 喺2007-04-01搵到.
- ↑ 〈印度時報：中國計劃修建瓜達爾至新疆鐵路和輸油管〉。原著喺2015年10月31號歸檔。喺2008年2月26號搵到。
- ↑ 〈人民網：穆沙拉夫擬建瓜達爾港–新疆石油運輸綫〉。原著喺2008年6月19號歸檔。喺2008年2月26號搵到。
- ↑ 海道咽喉被鎖 中國油如困獸
- ↑ 確保能源運輸 中國建中東至南海戰略防線[失咗效嘅鏈]
- ↑ 〈中國在巴基斯坦興建軍、油港〉。原著喺2016年3月7號歸檔。喺2008年2月22號搵到。
- ↑ 中新角力瓜達爾港經營權
- ↑ 迪拜世界退出瓜達爾港競標
- ↑ 中國競標巴基斯坦瓜達爾港敗陣 泛亞能源戰略遇阻