生餌

生餌（粵拼：saang1 nei6），又或者叫活餌，係指用生勾勾嘅動物做餌餵寵物。例如想像而家有一位寵物飼主，佢買幾隻生勾勾嘅倉鼠返嚟，將啲倉鼠同（例如）佢隻寵物蜥蜴擺喺一個浴缸裡邊（班倉鼠走唔甩），然後佢再畀隻蜥蜴捉啲倉鼠嚟監生食落肚。喺實際應用上，呢種做法通常係攞某啲昆蟲或者嚙齒目做飼料，而餵嘅對象通常係爬蟲類或者兩棲類，好似係蜥蜴、蛇或者龜呀噉。

呢竇老鼠仔係 feeder（粵拼：fit1 daa4）—英文餵飼者噉解，即係話呢啲老鼠仔係養嚟做寵物糧食嘅。

生餌嘅做法幾有爭議性，有專家指出，餵生餌可以畀一隻寵物發揮捕食者嘅本能，能夠為佢帶嚟刺激，但亦有好多人覺得噉做殘忍得滯。

常用生餌

以下呢啲小動物都係成日畀人攞嚟做生餌嘅：

• 昆蟲
  • 蟋蟀
  • 蝗蟲
  • 黃粉蟲
• 嚙齒目
  • 大鼠
  • 老鼠
  • 倉鼠
• 細隻嘅鳥類
  • 雞仔
  • 鴨仔

常見寵物

以下呢啲動物都係成日畀人用生餌嚟餵嘅：

• 爬蟲類
  • 蜥蜴
  • 蛇
  • 龜
• 兩棲類
  • 青蛙

理由

至於啲人點解會揀用生餌餵自己嘅寵物，一個常見理由係因為噉樣「自然」啲：有啲專家同爬蟲類愛好者主張，食肉動物喺佢哋嘅自然環境當中都係會捉生嘅獵物嚟食嘅，所以用生餌嚟餵呢啲寵物能夠畀佢哋展現自己喺自然環境下嘅行為、得到某啲人工飼料提供唔到嘅營養、仲可以透過追捕獵物嚟得到一定嘅認知刺激。有唔少爬蟲類愛好者亦都表示，話佢哋覺得用咗生餌之後佢哋嘅寵物活躍咗。

爭議

生餌呢種做法幾有爭議性：首先有動物權益人士指出，畀人攞嚟餵生餌嘅動物，往往會喺餵飼過程當中承受極大嘅恐懼同痛苦，所以呢種做法非常唔人道；而且亦有爬蟲類愛好者指出，喺餵生餌嘅過程入邊獵物梗會或多或少反抗，而佢哋反抗嗰時有可能會整傷隻寵物。因為呢種做法咁多爭議，有好多國家地區都會立法限制生餌嘅使用。

睇埋

• 捕食
• 飼料
• 環境豐富化

拎

• （英文） 雷公蛇能夠以幾快嘅速度食八隻倉鼠呢？，呢條片用咗倉鼠做生餌餵蜥蜴，初頭啲倉鼠嘗試逃走，但係最後都難逃畀蜥蜴食落肚嘅下場。呢啲噉嘅影片 YouTube 上邊大把。