白俄羅斯迫降客機事件

白俄羅斯迫降客機事件係指2021年5月23號，一架賴恩航空由雅典飛去維爾紐斯嘅客機飛過白羅斯上空嘅時候，俾白俄羅斯軍機強迫降落明斯克機場，並且捉走咗機上面兩個反對白俄羅斯政府嘅人。

白俄羅斯迫降客機事件
涉事飛機 SP-RSM
係一個	aircraft hijacking、passenger flight、forced landing
屬於	hijacking of Roman Pratasevich
發生喺	白羅斯
日期	2021年5月23號
目標	hijacking of Roman Pratasevich
參與嘅人數	171
死咗嘅人數	0
受傷嘅人數	0
白俄羅斯迫降客機事件嘅位置
[改維基數據]

賴恩航空總裁同埋歐盟政界都叫呢次事件做「國營劫機」。事發之後，歐洲好多國家都要求由本國出發嘅航班唔好路過白俄羅斯上空，而且唔准白俄羅斯國營航空公司嘅航機飛過自己嘅領空。事件亦令白俄羅斯同歐盟國家嘅關係迅速惡化，當中立陶宛同拉脫維亞仲踢走晒所有白俄羅斯外交人員。

航機

涉事客機係一架波音737-800，2017年投入服務，一直屬於賴恩航空。飛機嘅註冊編號喺2019年由愛爾蘭 EI-FZX 改做波蘭 SP-RSM。

事發當日，飛機飛嘅航線係 FR4978，朝早大約10點半喺希臘嘅首都雅典起飛，機上面有6個機組人員同126個乘客，原定下晝1點抵達立陶宛嘅首都維爾紐斯。

迫降

喺飛機經過白俄羅斯空域，飛到維爾紐斯以南45海里、明斯克以西90海里嘅時候，白俄羅斯航空管制話俾機長知，佢架機上面有「安全威脅」，指示飛機緊急降落明斯克機場，並且派咗架米格-29軍機「護航」。

飛機降落咗之後，白俄羅斯部隊搜查飛機上面所有人嘅行李。賴恩航空同埋白俄羅斯政府發言人都話搜唔出任何武器。大概七個鐘之後，飛機被放行，但係有至少一個白俄羅斯籍人士同埋四個俄羅斯籍人士（有啲報道話仲有一個希臘籍人士）冇跟架機繼續飛去維爾紐斯。

拉咗個記者

機上有兩個乘客俾白俄羅斯部隊捉咗落機，係一個白俄羅斯籍男記者同埋佢個俄羅斯籍女伴。個記者叫做羅文·帕塔些域治（白俄羅斯文：Раман Дзмітрыевіч Пратасевіч），事發嗰陣廿七歲，營運白俄羅斯親反對派網媒 Nexta，自從2020年白俄羅斯總統選舉以嚟流亡立陶宛。佢個女伴叫蘇菲亞·沙皮加（Sofia Sapega），俄羅斯籍，事發嗰陣係維爾紐斯歐洲人文大學（European Humanities University）嘅學生。