百步梯 (花縣)

百步梯，係喺廣州花縣嘅一個古老梯級，喺梯面鎮民安村北側山谷入邊。條梯係喺清康熙二十一年（1682年）廣東巡撫李士楨派兵鎮壓花山寨陣，拓闊起嘅。 2008年畀廣州市人民政府公佈做廣州市文物保護單位，記名係百步梯遺址。

地理

呢一帶群山因清代吳萬雄嘅花山寨起義，畀統稱做花山。地處花縣東北群山入邊，東北同從化接壤，西北毗鄰清遠，係聯繫粵北同廣東省城間嘅交通要道，舊陣時清遠、從化、花縣等地嘅鄉民上廣州都係會用呢條路。梯面鎮建立初係叫「百步梯林場」，因地處百步梯上邊，後尾建制就改叫「梯面」。

清順治四年（1647年），吳萬雄自循州（而家嘅廣東惠州）帶咗大隊人馬佔據咗盤古峒（而家嘅花縣梯面鎮一帶）聚義，號稱「花山寨」，憑藉險峻山嶺對抗官府，1682年李士楨就籍此起梯面山路，送兵攻打花山寨^[1]。

道光二十年（1840年），縣令包錦燦重修呢條路，自下而上鋪咗麻石成366級，長256米，望上去就好似雲梯咁，就有咗「百步梯」嘅名。

1938年日軍佔領花縣老城區後，原預想由百步梯攻上梯面，駐守官兵就拆咗百步梯中段石級搞防禦工事，抵擋咗日軍嘅多次進攻。

1945年光復後，巴拿馬歸僑蘇彰保聯合部分華僑捐資，修復咗戰時拆咗嘅梯級。

1965年，搞水利工程同築盤山路拆走咗部分石級，剩低咗中段120米長嘅大概130個石級^[2]。

百步梯遺址而家係高百丈風景區入邊嘅一部分，高百丈屬於花縣八景之一，號稱「百丈晴巒」，以遍佈奇石怪岩而出名聞名。「高百丈」一帶傳聞係好耐以前係瑤族嘅盤古國，明代横潭瑤族首領譚觀福同眠花山寨，都話係喺同一度起事嘅^[3]。