皇天不負好心人 (1954年)

《皇天不負好心人》（英文：Heaven Never Lets the Kind-Hearted Down）係1954年嘅一部黑白粵語片，講兩姊妹嘅愛情遭遇，由周詩祿執導，何非凡、羅艷卿領銜主演。

情節

方鳴鳳、鳴珠姊妹義助淪落街頭嘅音樂老師胡老克、小克兩父子，令勢利嘅方媽好不滿。老克為咗幫小克完成學業，就死慳死抵，鳴鳳耐唔耐都有接濟佢哋，重幫老克喺夜總會搵到份工。

有錢仔馮紹華狂追鳴珠，小克又對鳴珠有意思，但係鳴珠係一個拜金主義者，方媽怕佢兩個會撻著，就將兩父子趕走，好彩得工友梅山收留。

鳴鳳暗戀小克，可惜神女有心，襄王無夢。小克畢業之後搵到嘢做，生活開始安定。小克之後發現鳴鳳人品唔錯，對佢印象大改，兩個二人感情越來越好。

方媽一心想攀龍附鳳，遊說鳴珠嫁俾二世祖紹華，結果鳴珠俾人拋棄，鳴鳳就同學業有成嘅小克修成正果。