百嘉新邨

響香港島鰂魚涌英皇道1010-1056號有五棟私人住宅樓，分別叫海景樓、福昌樓、海山樓、益發大廈同益昌大廈，因為建築望落好逼狹及人口密集而出名。呢五棟樓共有 2243 間屋，可住過萬人。

圖中正對鏡頭嘅係福昌樓一部分，左手邊係益昌大廈，右手邊係益發大廈。

向上望

呢五棟樓起嗰時叫做百嘉新邨，中途爛尾，卒之喺1970年代起好，分成五棟出售。荷里活電影《變形金剛：殲滅世紀》響度攞過景，畀人叫做「怪獸大廈」，亦叫做「五廈」，而坊間唔少人用「海山樓」個名統一稱呼呢五棟樓。

五棟樓嘅地址分別係，1010-1026號海景樓，1028號海山樓，1032-1044號福昌樓，1046號益昌大廈，1048-1056號益發大廈。

呢笪地方好受遊客歡迎，搞到居民要擺唔畀影相嘅「告示」，《攻殼機動隊》同《變形金剛：殲滅世紀》都用過景嚟做套戲嘅創作基礎。