監獄體
監獄體（Prison Gothic） 係隻黑體字體，用喺香港七十到九十年代嘅路牌之上。
監獄體源自1970年監獄署（即係而家懲教署）接受工務司署嘅委託整路牌，由監獄入面嘅監犯手造中文字體，風格類似金梅粗黑體，而呢啲字體就被叫做「監獄體」。去到1997年，路牌製作設計電腦化，手造嘅字體畀電腦字體取代咗。
監獄體嘅字形同而家通行嘅電腦字形有些少差異，反映舊時香港社會用到嘅一啲異體字寫法。
2016年，民間組織「道路硏究社」發起「監獄體再現計劃」，將舊路牌用嘅監獄體數碼化保存，再仿製出其他路牌上面冇嘅字。2022年7月佢哋搞咗個「監獄體衆籌計劃」，目標係要籌到至少七十萬港紙。如果眾籌達標嘅話，每位肯捐至少950蚊港紙嘅支持者都可以攞到「監獄體 Medium」嘅永久授權。
攷 編輯
- 監獄體路牌見證時代變遷 異體舊字形反映香港情懷更具日本血統，香港01 ，2021-09-27