宰相，係對中國古代輔助帝王官僚首長嘅通稱，唔同朝代有唔同嘅名，例如丞相、相國、尚書令、中書令、侍中、同平章事等。作為舊時中國朝廷官員嘅阿頭，地位只係低過統治者，即係「一人之下，萬人之上」。呢個職位早喺春秋時期已經存在，秦朝作為第一個中央集權王朝正式設立丞相作為三公之首。到明朝洪武十三年（1380年）發生胡惟庸案之後，畀明太祖朱元璋廢咗，之後嘅中國皇帝實行完全嘅獨裁統治。
